काठमाडौं– बिहीबारदेखि शुरु भएको बहुक्षेत्रीय प्राविधिक तथा आर्थिक सहयोगका लागि बंगालको खाडी राष्ट्रको प्रयास (बिम्स्टेक) को चौथो शिखर सम्मेलन आज सकिँदैछ । काठमाडौं घोषणापत्र जारी गर्दै सम्मेलनको समापन हुनेछ । 
कार्यतालिकानुसार अहिले  बिहान ८ बजे होटल सोल्टीमै पाहुनाहरुलाई रिट्रिट गरिएको छ । 

त्यसपछि १० बजेर ३० मिनेटमा सम्मेलन अाैपचारिक रूपमा सुरु हुनेछ । मध्याह्न १२ बजे बिम्स्टेक शिखर सम्मेलन काठमाडौं घोषणापत्र पारित गरिएसँगै १२ बजेर २० मिनेटमा सामूहिक फोटो सेसनपछि पत्रकार सम्मेलन गरी सम्मेलन समापनको घोषणा हुनेछ । 

सम्मेलनमा प्रधानमन्त्री केपी शर्मा ओलीसहित भारतीय प्रधानमन्त्री नरेन्द्र मोदी, बंगलादेशी प्रधानमन्त्री शेख हशिना, म्यानमारका राष्ट्रपति विन मिन्टऽ थाइल्यान्डका प्रधानमन्त्री प्रयुत व चा , भुटानका  अन्तरिम सरकारका प्रमुख सल्लाहकार एवं प्रधानन्यायाधीश ल्यान्पोछिरिङ वाङचुक  र श्रीलंकाका राष्ट्रपति मैत्रीपाला सिरिसेना सहभागि छन् । 

यसैबीच सम्मेलन सकिएसँगै  सदस्य राष्ट्रका सरकार प्रमुखमध्ये ४ जना आज स्वदेश फर्किने तय भएको परराष्ट्र मन्त्रालयले जनाएको छ । 

मन्त्रालयका अनुसार भारतीय प्रधानमन्त्री  मोदी, बंगलादेशकी प्रधानमन्त्री  हसिना र म्यानमार राष्ट्रपति विन मिन्ट र थाइल्यान्डका प्रधानमन्त्री प्रयुत व चा आज स्वदेश फर्किन लागेका हुन् ।

भुटानका अन्तरिम सरकारका प्रमुख सल्लाहकार एवं प्रधानन्यायाधीश ल्यान्पोछिरिङ वाङचुक भोलि र श्रीलंकाका राष्ट्रपति मैत्रीपाला सिरिसेना आइतबार फर्कने कार्यक्रम छ ।

स्थापनाको दुई दशकपछि नेपालले पहिलोपटक बिम्स्टेकको शिखर सम्मेलन आयोजनाको अवसर पाएको हो । 

सन् १९९८ देखि नेपाल यसको आमन्त्रित र सन् २००४ फेब्रुअरीमा थाइल्याण्डमा भएको छैटौँ मन्त्रिस्तरीय बैठकबाट नेपाल र भूटान पूर्ण सदस्य भएका थिए । अध्यक्षीय कार्यकाल हरेक दुई वर्ष हुने गर्छ ।