लोकान्तर संवाददाता

काठमाडौं, १८ फागुन– काठमाडौं महानगरपालिकाको प्रमुख कार्यकारी अधिकृत (सिईओ) मा ईश्वरराज पौडेल नियुक्त भएका छन् । संघीय मामिला तथा स्थानिय विकास मन्त्रालयले मंगलवार पौडेललाई महानगरपालिकाको सिईओमा नियुक्त गर्ने निर्णय गरेको थियो ।

यसअघि अख्तियार दुरुपयोग अनुसन्धान आयोगमा सहसचिव रहेका पौडेललाई केही दिनअघि स्थानिय विकास मन्त्रालयमा ल्याइएको थियो । मंगलवारको निर्णयले उनलाई महानगरपालिकाको जिम्मेवारी सुम्पेको हो ।

पौडेल यसअघि कास्की जिल्लामा स्थानीय विकास अधिकारीसमेत रहेका थिए ।

यद्यपि, उनले महानगरको जिम्मेवारी सम्हालिसकेका भने छैनन् ।

यसअघि सिईओ रहेका रुद्रसिंह तामाङलाई भने स्थानिय विकास मन्त्रालयको वातावरण महाशाखामा तानिएको छ ।