२६ जेठ २०८३, मंगलबार
काठमाडौं – भारतको बिहारमा इन्सेफलाइटिसबाट मर्नेको संख्या बढेर १३० पुगेको छ ।
भीषण गर्मीसँगै मृतकको संख्या बढेको हो । मुजफ्फरपुर मेडिकल कलेज र केजरीवाल अस्पतालमा यस रोगबाट मर्नेको संख्या १३० पुगेको हो । ३०० जना गम्भीर रोगी छन् ।
अन्य अस्पतालको त आँकडा समेत आएको छैन । मर्ने वा गम्भीर रूपमा बिरामी हुनेमध्ये ८० प्रतिशत बालिका छन् ।
विशेषज्ञहरूले यस क्षेत्रमा कुपोषणको भयावह समस्या रहेको पत्ता लगाएका छन् । कुपोषणको शिकार बालिकाहरू हुन्छन् र उनीहरूमा आइरनको कमी हुन्छ ।
सन् २०१४ मा देशमा रोगबाट प्रभावित ६० जिल्लाको पहिचान गरिएको थियो र त्यहाँ सघन अभियान चलाउने कुरा गरिएको थियो । पाँच मन्त्रालयको एक समिति पनि बनाइएको थियो । तर त्यसको एउटा बैठक पनि बसेन ।
यस प्रकरणमा बिहारका मुख्यमन्त्री नीतीश कुमारले गम्भीर प्रश्नको सामना गर्नुपरेको छ । राज्यले रोग नियन्त्रणमा किन कमी राख्यो भनी प्रश्न उठिरहेको छ ।
आलोचनाका बीचमा नीतीश मंगलवार मुजफ्फरपुर पुगे । उनी अस्पताल पुग्दा त्यहाँ भेला भएका मानिसले कडा विरोध गरे अनि नीतीश फर्किऊ भनी नारा लगाए । बालबालिकाको मृत्युका कारण रिसाएका परिवारले नीतीश मूर्दाबाद र हाय हायका नारा लगाए ।
एजेन्सी
