२० असार २०८३, शनिबार
काठमाडौं– आज बस्ने भनिएको सत्तारूढ दल नेपाल कम्युनिस्ट पार्टी (नेकपा)को सचिवालय बैठकअघि नेताहरू आन्तरिक छलफलमा व्यस्त भएका छन् ।
दिउँसो १ बजेदेखि सचिवालय बैठक बस्ने तयारी थियो । तर बिहानको खाना पनि नखाई प्रचण्ड निवास खुमलटारमा पूर्वमाओवादी पक्षका शीर्ष नेताहरू जम्मा भएका छन् ।
'नेताहरू आउनेजाने भइरहन्छ तर आज सचिवालय बैठकका लागि पूर्वतयारी स्वरूप भेला हुनुभएको हो,' खुमलटार स्रोतले भन्यो, 'आजको सचिवालयले महत्त्वपूर्ण निर्णय गर्ने र त्यससम्बन्धमा पूर्व सहमति आवश्यक देखिएकाले नेताहरू बैठक र छलफलमा जुट्नुभएको हो ।'
असार मसान्तभित्र नै एकताका सम्पूर्ण प्रक्रिया सक्ने भनिएको भएता पनि सहमति जुट्न नसकेका कारण एकता प्रक्रिया लम्बिएको थियो ।
असार ३१ गते साँझ अबेरसम्म बसेको शीर्ष नेताहरूको बैठकले पूर्व एमाले र पूर्व माओवादीबीच विभागहरूको भागबण्डा गरेको थियो ।
भागबण्डा अनुसार ३२ विभागमध्ये पूर्व एमालेको पक्षमा १८ र पूर्वमाओवादीको पक्षमा १२ विभाग परेको थियो ।
पूर्व एमालेका नेताहरूले आफ्नो भागमा परेका चार महत्त्वपूर्ण विभागहरूको नेतृत्व टुंगो लगाइसकेको छ ।
जसअनुसार संगठनमा वामदेव गौतम, स्कूलिङमा ईश्वर पोखरेल, विदेश विभागमा माधवकुमार नेपाल र नीति तथा प्रतिष्ठान विभागमा वरिष्ठ नेता झलनाथ खनाल तोकिइसकेका छन् भने पूर्व माओवादीतर्फ परेको आर्थिक र प्रचार विभागको नेतृत्व तोक्न बाँकी छ ।
आज बस्ने सचिवालय बैठकले जिल्ला इञ्चार्ज, बाँकी रहेका अन्य विभाग, आयोगहरू, सल्लाहकार परिषद, जेष्ठ नागरिक संगठनको नेतृत्वमा सहमति जनाउनेछ ।
