नेकपामा जिल्ला सह-इन्चार्जको संख्या अस्वाभाविक, कहीँ १०, कहीँ शून्य !

काठमाडौँ - सत्तारूढ दल नेपाल कम्युनिस्ट पार्टी (नेकपा)को आइतवार बसेको सचिवालय बैठकले ७७ जिल्ला र ६ वटा महानगरपालिकाको नेतृत्व टुंगो लगायो । तर कतिपय जिल्लाको नेतृत्वमा अस्वाभाविक रूपमा सहइन्चार्जको संख्या १० सम्म छन् भने कुनै जिल्लाहरूमा एक जना पनि सहइन्चार्ज छैनन् ।

लोकान्तरलाई प्राप्त सूची अनुसार जम्मा १८ वटा जिल्लाहरूमा नेकपाले सह-इन्चार्जको टुंगो लगाउन सकेको छैन । तिमध्ये भाष्कर काफ्लेलाई इन्चार्ज तोकिएको ताप्लेजुङमा एकजना पनि सह-इन्चार्ज छैनन् भने इलाम, धनकुटा, ओखलढुंगा, सप्तरी, नुवाकोट, काभ्रेपलान्चोक, मनाङ, पर्वत, म्याग्दी, मुस्ताङ, नवलपारासी पश्चिम, गुल्मी, प्युठान, बर्दिया, दार्चुलाको नेतृत्वमा पनि इन्चार्जमात्रै तोकिएको छ ।


Advertisement

तर सिराहा, धनुषा, काठमाडौँ, दाङ, कैलाली लगायतका जिल्लाहरूमा भने ८ देखि १० जनासम्म सह-इन्चार्ज छन् । सिराहामा लीला श्रेष्ठ इन्चार्ज छन् भने अजयशंकर नायकसहित १० जनालाई सह-इन्चार्ज तोकिएको छ । त्यस्तै धनुषामा जोगकुमार बरबरियाको नेतृत्वमा जुली महतोसहित ९ जना सह-इन्चार्ज छन् । काठमाडौँमा अन्जना विशंखेसहित ९ जना सह-इन्चार्ज छन् भने दाङमा पनि ९ जना नै सह-इन्चार्ज छन् ।

जिल्लासरहकै हैसियत पाएका महानगरपालिकाहरूमा पनि नेकपाले सह-इन्चार्जको आवश्यकता ठानेन । शिवकुमार मण्डल इन्चार्ज भएको विराटनगर महानगरपालिका, दिनेश राईको नेतृत्वमा वीरगंज, रेणु दाहालको नेतृत्वमा भरतपुर, शुशीला नेपालको नेतृत्वमा ललितपुर, जीवनराम श्रेष्ठको नेतृत्वमा काठमाडौँ र मानबहादुर जीसीको नेतृत्वमा रहेको पोखरा महानगरपालिकामा कुनै सह-इन्चार्ज तोकिएको छैन ।


Advertisement

सह-इन्चार्जको संख्या किन यसरी अस्वाभाविक रूपमा कम र बढी भयो भन्ने प्रश्नमा नेकपा सचिवालयका एक सदस्यले सन्तुलन मिलाउन त्यसो गरिएको जवाफ दिए । उनका अनुसार असन्तुष्टको संख्या धेरै हुन सक्ने भएकाले कहीं धेरै सह-इन्चार्ज राखिएको हो । सह-इन्चार्ज नतोकिएको जिल्लामा भने केही दिनमा तोक्ने र संख्यामा केही घटबढ हुन सक्ने उनको भनाइ छ ।

पढ्नुहोस्, यो पनि :

यी हुन् ७७ जिल्ला र ६ महानगरका नेकपा इञ्चार्ज तथा सह–इञ्चार्ज [सूचीसहित]​

जिल्ला सचिवमा घटुवा भएका ४ नेतालाई इञ्चार्ज बनाएर 'पुरस्कार', अन्य २ सह-इञ्चार्ज तोकिए !

 

 

 

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्