काठमाडौं – बार्सिलोनाका कप्तान लियोनल मेसीले सर्वाधिक छैटौंपटक फिफा वर्ष खेलाडीको अवार्ड जितेर अर्को एक किर्तिमान आफ्नो नाममा लेखाएका छन् ।

यी अर्जेन्टिनी खेलाडी आफ्नो स्टारडम, अद्भुत क्षमता, सफलता र व्यक्तिगत कीर्तिमानका लागि चिनिन्छन् । फूटबल इतिहासकै महानतम खेलाडीमध्येका एक मेसी अहिले ३२ वर्षका भए । उमेर ढल्कँदै जाँदा खेलाडीको प्रदर्शन खस्किन्छ भन्ने आम बुझाई विपरीत मेसीको खेलमा दिन–प्रतिदिन निखार आउँदै छ ।

उनले आफ्नो लय र फिटनेसलाई कसरी निरन्तरता दिइरहेका छन् त ? 

अभ्यास र व्यायाम

मेसीले आफ्ना व्यायाम प्रशिक्षकको रोहवरमा नियमित रूपमा वर्कआउट प्लान फलो गर्छन् । तर, अन्य खेलाडीले जस्तो हेभी व्यायाम भने गर्दैनन् । आफ्नो शरीरको गति कसरी बढाउने र खेलमा कसरी जीवन्त रहने भन्नेमा उनी सचेत देखिन्छन् । यसकारण आफ्नो शरीरको मुभमेन्ट कायम राख्न उनले पिल्लर ब्रीज फ्रन्ट, लन्ज ह्यामस्टिङ, स्ट्रेच र पिल्लर स्किप्सजस्ता अभ्यास गर्ने गरेका छन् । 

यसपछि विभिन्न दिशामा कुद्न सक्नेगरी गति तथा फोकस बढाउन लिनियर स्पिड वर्कआउट गर्छन् । 

त्यस्तै, खुट्टाको मसल्स निर्माणका लागि पिल्लर स्किप्स, स्किपिङ रोप्स र स्क्वेट्स गर्छन् । तीव्रताका लागि उनी डाइगोनल हर्डल्स होप्सलगायत अभ्यास गर्छन् । हरेक वर्कआउटको अन्त्यपछि उनी पर्याप्त पानी पिउँछन्  र कुलडाउन हुनका लागि ५ देखि १० मिनेटसम्म हल्का जगिङ गर्छन् । 

खाना
मेसी आफ्नो क्षमता कायम राख्नका लागि कडा खालका डाइट चार्ट फलो गर्छन् । इटालियन न्युट्रिसियनिस्ट जुलियानो पोसरले सन् २०१४ यता मेसीको डाइट चाट तयार गर्छन् । उनले पाँचवटा प्रमुख खानालाई पहिचान गरेका छन्,– पानी, ओलिभ तेल, अनाज, ताजा फलफूल र ताजा तरकारी ।

यी खाद्यान्न मेसीको डाइटछका प्रमुख हिस्सा हुन् । यसबाहेक बदाम र गेडागुडी पनि उनलाई मनपर्छ । तर, पोसरले मेसीलाई सुगरयुक्त खाना नखान सुझाव दिएका छन् । ‘मसल्सका लागि सुगर निकै खराब छ, त्यसैले यसबाट जति टाढा बस्यो, उति राम्रो,’ पोसर भन्छन् । 

पोसरले शुरूदेखि नै मांसाहारी भोजन कम गर्न मेसीलाई सुझाव दिने गरेका थिए । शुरूमा मेसीले मासु छाड्न निकै संघर्ष गर्नुपर्‍यो  । तर उनी बिस्तारै अभ्यस्त हुँदै गए । मेसीलाई पोसरले पिज्जासमेत नखान सुझाव दिएका छन् । नयाँ पत्रिकामा खबर छ ।