काठमाडौं – नेत्रविक्रम चन्द ‘विप्लव’को समाचार शेयर गरेको भन्दै प्रहरीले ३ दिनदेखि प्रलाद न्यौपानेलाई हिरासतमा राखेको छ ।

नुवाकोट हल्देकालिका–८ स्थायी घर भई हाल मनमैजु बस्ने २७ वर्षीय न्यौपानेलाई कात्तिक २४ गते प्रहरीले लाजिम्पाटबाट पक्राउ गरेको हो । 

पक्राउ परेका उनलाई महानगरीय प्रहरी वृत्त बालाजुले सार्वजनिक मुद्धा चलाएर हिरासतमा राखेको छ । 

उनका दाजु सुशान्त न्यौपानेलाई समेत प्रहरीले सोही स्थानबाट पक्राउ गरी आँखादेखि मुखसम्म कालो कपडाले ढाकेर ४ घण्टा बाहिर घुमाएपछि मात्रै प्रहरी कार्यालय लगेको सुशान्त न्यौपानले बताए । 

‘प्रहरीले मलाई १ दिन नियन्त्रणमा लिएर छोड्यो भने भाइ प्रलादलाई विप्लवको समाचार शेयर गरेको र चन्दा मागेको भन्दै ५ दिनको म्याद थप गरी थुनामा राखेको छ,’ सुशान्तले भने ।

महानगरीय प्रहरी वृत्त बालाजुका डीएसपी बालनरसिंह रानालाई सम्पर्क गर्दा केन्द्रिय अनुसन्धान व्यूरोले पक्राउ गरेर प्रतिवेदनसहित पठाएको हुँदा सार्वजनिक मुद्धा चलाएर थुनामा राखेको स्वीकार गरे । 

किन र के विषयमा पक्राउ गरी मुद्धा चलाएको भन्ने प्रश्नमा रानाले आफूलाई कुनै जानकारी नभएको र सबै कुरा बुझ्नको लागि प्रहरीको केन्द्रीय अनुसन्धान ब्यूरोमा खबर गर्न भन्दै पन्छिए ।

तर डीएसपी रानाले भने अनुसार प्रहरीको केन्द्रीय अनुसन्धान ब्यूरोमा सम्पर्क गर्दा उक्त नाम ठेगाना भएको व्यक्ति पक्राउ नपरेको ब्यूरोका प्रवक्ता बेलबहादुर पाण्डेले जानकारी दिए ।

प्रहरीको विशेष ब्यूरोमा सम्पर्क गर्दा सोही नाम ठेगाना भएको व्यक्ति पक्राउ नपरेको ब्यूरोले जनाएको छ । पक्राउ परेका प्रलादका आफन्तले भने उनले विप्लवको समाचार शेयर गरेको विषयलाई लिएर प्रहरीले पक्राउ गरी पुलिसमाथि अभद्र व्यवहार गरेको भन्दै भूmटा मुद्धा चलाइएको जनाएका छन् ।