काठमाडौं, २५ चैत –सरकारले चालू सिजनका लागि सर्वोच्च शिखर सगरमाथा आरोहण खुला गरेसँगै दैनिक औषत ३ टोलीले परमिट लिएका देखिएको छ । पर्यटन विभागका अनुसार परमिट सुरु गरेको १० दिनमा ३० टोलीले आरोहणका लागि स्वीकृति लिएका छन् ।
विभागका प्रवक्ता दुर्गादत्त ढकालका अनुसार सगरमाथा आरोहणका लागि स्वीकृति लिनेमा २९ विदेशी टोली र एक नेपाली टोली छ ।
‘स्वीकृति लिएकामध्ये अधिकांश टोलीले आरोहण सुरु गरिसकेका छन्,’ विभागका प्रवक्ता ढकालले भने ।
विभागले यही चैत १३ गतेदेखि बसन्त ऋतुका लागि सगरमाथा आरोहण खुुला गरेको थियो ।
विभागले यो सिजनभरी अर्थात आगामी मे महिनासम्म सगरमाथा आरोहणका लागि स्वीकृति दिने गरेको छ ।
विभागका अनुसार गत साल बसन्त ऋतुमा १ सय ८ टोलीले सगरमाथा आरोहणको अनुमति लिएका थिए ।
