पूर्वप्रधानमन्त्री तथा समाजवादी पार्टीका अध्यक्ष डाक्टर बाबुराम भट्टराई चुनाव प्रचार प्रसारका क्रममा दाङको हापुरे पुगेका छन् ।

सामाजिक सञ्जाल ट्वीटरमा तस्वीरहरू सेयर गर्दै भट्टराईले दाङको हापुरेस्थित शिवलाल खत्रीको घर अवलोकन गरेको र त्यसले रोमान्चक अनुभूति दिएको उल्लेख गरे ।

२०६० सालको साउन ३२ देखि भदौ ३ गतेसम्म तत्कालीन जनयुद्धमा रहेको माओवादी र सरकारबीच हापुरेस्थित खत्रीको घरमा असफल वार्ता भएको थियो ।

हापुरेमा भएको वार्ता त्यतिबेला अन्तिम चरणको वार्ता थियो । २ दिनसम्म खत्रीको घरमा चलेको वार्ताले एक साताभित्र अर्को वार्ताको मिति तोक्ने सहमति गरेको थियो तर अर्को चरणको वार्ता कहिल्यै आएन ।

भदौ १० गते तत्कालीन माओवादीले एकतर्फी  युद्धविराम भंग गरेको थियो । उक्त वार्ताटोलीलाई माओवादीका तर्फबाट भट्टराईले नेतृत्व गरेका थिए भने सरकारका तर्फबाट कमल थापाले नेतृत्व गरेका थिए ।

हापुरेमा वार्तालाइ तत्कालीन सभामुख दमननाथ ढुंगाना र स्व. पदमरत्न तुलाधरले मध्यस्थता गरेका थिए ।

२०६० श्रावण ३२-भदौ २ सम्म ऐतिहासिक शान्तिवार्ता भएको दांग हापुरेस्थित शिवलाल खत्रीको घरको अवलोकन गर्दा रोमान्चक अनुभूति! त्यस अघि हापुरे चोकमा आकर्षक चुनावी जनसभा! pic.twitter.com/fMBwsoylep

— Baburam Bhattarai (@brb1954) November 27, 2019