भारतको पञ्जाबमा ४२ वर्षीया सुमीत कौरले टाउको र अनुहारमा गोली लिएर घरबाट सात किलोमिटर टाढा रहेको मुक्तसर जिल्लास्थित प्रहरी चौकी पुगेकी छन् । उनले भाइ र भदाविरुद्ध आफ्नो जमीन हडपेको उजुरी दिएको प्रहरीले शुक्रवार जनाएको छ । 

कक्षा १० मा पढ्ने उनको भदाले आफूलाई अनि आमा सुखजिन्दर कौरलाई रिसको सुरमा गोली चलाएको उनले बताइन् । मुक्तसरको सामेवाली गाउँमा बुधवार बेलुका जमीन विवादका क्रममा उनले गोली चलाएका हुन् । सुखजिन्दरलाई एक गोडामा दुई गोली लागेको छ ।

प्रहरीले सुमीतका भाइ हरिन्दर सिंह र भदालाई खोजी गरिरहेको छ । 

प्रहरी चौकी पुग्नेबित्तिकै सुमीतलाई मुक्तसरमा रहेको निजी अस्पताल दौडाइएको थियो । चिकित्सकहरूले गोली निकालेका थिए । 

चिकित्सक मुकेश वंशलले भने, ‘टाउकोमा तीन गोली लागेपछि पनि उनी बाँचेको देख्दा हामी आश्चर्यमा पर्‍यौं । धन्य उनको खप्परलाई गोलीले फ्य्राक्चर गरायो र मस्तिष्कमा प्रवेश गरेन । उनी अहिले खतरामुक्त छिन् ।’

उजुरीमा सुमीतले भनिन्, ‘हामीसँग ४० एकड जमीन थियो र मेरा पिताको मृत्युपछि जमीन आमा, भाइ र मलाई बाँड्यौं । मैले १६ एकड पाएँ । तर मेरो भाइ मेरो भाग पनि खोस्न चाहन्छ । उसले छोरा पठाएर हामीलाई मार्न लगायो ।’
आमा सुखजिन्दरले भनिन्, ‘मेरो छोरोले विगतमा पनि ममाथि आक्रमण गरेको छ । भगवानको कृपाले हामी गोली लागे पनि बाँच्यौं । हामीलाई अब न्याय चाहियो ।’

इन्डियन पिनल कोड र आर्म्स याक्ट अन्तर्गत ज्यान मार्ने उद्योग र आपराधिक षड्यन्त्रको मुद्दा उनीहरूविरुद्ध मुद्दा दायर गरिएको छ ।

एजेन्सी