काठमाडौं– हवाइमार्गबाट करिब ३० वर्ष अगाडिदेखि भइरहेको सुन तस्करीको छानबिन अन्तिम चरणमा पुगिरहेका बेला त्रिभुवन अन्तर्राष्ट्रिय विमानस्थलमा सुन तस्करी गर्ने नयाँ उपाय अपनाइन थालिएको छ । 

सुन तस्करहरुले मलद्वार (दिसा गर्ने ठाउँ)मा लुकाएर सुन तस्कर गर्न थालेका छन् । प्रहरीले शनिवार त्रिभुवन अन्तर्राष्ट्रिय विमानस्थलबाट २ जना भारतीय ‘यात्रु’लाई पक्राउ गरेपछि मलद्वारमा लुकाएर सुन तस्करी हुने गरेको रहस्य खुलेको हो । 

थाई एयरलाइन्सको उडान नम्बर टीजी३१९ मा शनिवार थाइल्याण्डको बैंककबाट नेपाल आएका २ जना भारतीय नागरिकलाई चेकजाँच गर्ने क्रममा उनीहरुको मलद्वारामा २ हजार ६ सय ७० ग्राम (२ किलो ७ सय ६० ग्राम) सुन फेला परेको त्रिभुवन अन्तर्राष्ट्रिय विमानस्थल प्रहरीका प्रवक्ता एसपी दिनेश राज मैनालीले बताए । 

पक्राउ पर्नेमा एन४६१७८९० नम्बरको भारतीय राहदानी बोकेका इमरान र जेड४१७४१०७ नम्बरको भारतीय राहदानी बोकेका आरिफ अलि छन् । 

प्रहरीका अनुसार इमरानले ९९२ ग्राम सुन मलद्वारमा लुकाएर ल्याएका थिए भने इमरानले १ किलो ७ सय ६७ ग्राम सुन आफ्नो मलद्वारमा लुकाएर ल्याएका थिए । 

उनीहरुबाट बरामद भएको सुनको हालको बजारमूल्य १ करोड ३० लाख २ सय ३० रुपैयाँ रहेको प्रहरीले जनाएको छ । 

पक्राउ परेका २ जनालाई आवश्यक छानबिन तथा कारबाहीका लागि त्रिभुवन अन्तर्राष्ट्रिय विमानस्थलको भन्सार कार्यालयमा पठाइएको प्रहरीले जनाएको छ ।