भारतमा लोकसभा चुनावको परिणाम आइरहँदा गठबन्धनको राजनीति परास्त भएको छ । उत्तर प्रदेश, बिहार, महाराष्ट्र र कर्नाटक जस्ता राज्यमा विपक्षी दलले गठबन्धन बनाएर भारतीय जनता पार्टीविरुद्ध चुनावी प्रतिस्पर्धा गरेका थिए । 

तर विपक्षीका सबै समीकरण प्रधानमन्त्री नरेन्द्र मोदीको आकर्षणका अगाडि धराशायी भए । गठबन्धन पनि असफल भयो अनि जातीय समीकरण पनि फेल भयो । यहाँ हामी भाजपा नेतृत्वको एनडीएले दोस्रो कार्यकाल चलाउनका लागि पाएको जनमतका १० कारणको चर्चा गर्दैछौं । 

बलियो नेताको छवि
नरेन्द्र मोदीको मजबूत नेताको छविले उनलाई देशभरि सर्वमान्य नेताका रूपमा प्रस्तुत गरिदियो । नोटबन्दी, जीएसटी तथा आतंकवादविरुद्ध उनका कडा फैसलाले उनलाई मजबूत नेताको छवि दिलायो । विपक्षीहरू मोदीका अगाडि असहाय देखिए । यसले पनि भाजपा र एनडीएलाई भोट दिलायो ।

जातभात असफल, काम सफल
उत्तर प्रदेश, बिहार, कर्नाटक र महाराष्ट्र जस्ता राज्यमा विपक्षी दलहरूको गठबन्धन पूरै असफल भयो । जातिको नाममा गरिएका गठबन्धनलाई जनताले तिरस्कार गरे । जनताले केन्द्र सरकारका योजनाहरूको पक्षमा बेस्सरी भोट दिए । यी सबै राज्यमा जातीय समीकरण भताभुंग भयो । 

राष्ट्रवादको नारा
चुनावमा प्रधानमन्त्री मोदीले राष्ट्रवादको नारा दिएका थिए । लगभग सबै चुनावी सभामा मोदीले राष्ट्रवादको मुद्दा उठाए । आतंकवादीहरूका विरुद्ध सरकारको कडा कदमको उल्लेख गरियो । जनतामा मोदीको अपीलले काम गर्‍यो । फलस्वरूप लोकसभा चुनावमा भाजपाको प्रदर्शन सन् २०१४ को भन्दा पनि राम्रो रह्यो । 

बालाकोट हवाई आक्रमण
पुलवामामा आतंकवादी आक्रमणपछि भारतीय वायुसेनाले पाकिस्तानको बालाकोटमा हवाई आक्रमण गरेर प्रधानमन्त्री मोदीको छविलाई थप बलियो बनायो । भारतीय वायुसेनाले पाकिस्तानमा पसेर आतंकवादीहरू बसेको ठाउँ ध्वस्त पारेपछि मोदीको याक्सनलाई प्रशंसा गरियो । चुनावका बेलामा मोदीले यो आक्रमणको अत्यधिक चर्चा गरे र बलियो सरकार चलाएको भन्दै विपक्षीलाई तारो बनाए । 

ब्रान्ड मोदी
लोकसभा चुनावमा नरेन्द्र मोदी आफ्नो दल र गठबन्धनको ब्रान्डका रूपमा देखिए । उनले भाजपाका लागि मात्र नभई एनडीएका लागि भोट मागे । एनडीए गठबन्धनमा संलग्न सबै ३६ दलले मोदीको नामलाई सदुपयोग गरे । अनेकौं सीटमा एनडीएका उम्मेदवारहरूले मोदीकै नाममा भोट मागे । 

कल्याणकारी योजना
केन्द्रीय सरकारले ल्याएको योजना आयुष्मान भारत, उज्ज्वला, किसान सम्मान निधि, स्वच्छ भारत अभियानअन्तर्गत शौचालय निर्माण जस्ता योजनाले धरातलीय स्तरमा भाजपाको पक्षमा मतदाताहरूलाई आकर्षित गर्‍यो । यी योजनाहरूको धरातलीय स्तरमा कार्यान्वयन र यिनमा भ्रष्टाचार नहुँदा पनि एनडीएलाई फाइदा भयो । मोदीले चुनाव प्रचारमा केन्द्रका यी योजनालाई बारम्बार उल्लेख गरे । चुनाव परिणाममा भाजपाले यसबाट फाइदा उठाएको देखिन्छ । 

प्रत्येक राज्यका लागि फरक समीकरण
भाजपाले लोकसभा चुनावमा हरेक राज्यका लागि फरक फरक रणनीति अपनायो । उत्तर प्रदेश, बिहार, महाराष्ट्र, पश्चिम बंगाल, कर्नाटक र उडिसामा भाजपाले फरक फरक रणनीति उपयोग गरेको थियो । बंगालमा भाजपाको रणनीतिक अत्यधिक सफल रह्यो र राज्यमा पार्टीले ममता बनर्जीको किल्ला भत्काउन सफल रह्यो । त्यसबाहेक उत्तर प्रदेश र बिहारमा एनडीएले गठबन्धनलाई ठूलो अन्तरले हराउन सफल भयो । महाराष्ट्रमा भाजपा र शिवसेनाको गठबन्धनले भारी जीत पायो । 

सहयोगीहरूलाई ध्यान
सन् २०१४ को चुनावपछि यस चुनावमा पनि भाजपाले आफ्ना सहयोगीहरूलाई पूरै ध्यान दिए । महाराष्ट्रमा शिवसेनासँगको मतभेद भुलाएर भाजपाले सँगै चुनाव लड्यो । त्यसबाहेक बिहारमा जनता दल युनाइटेडलाई पनि आफूले जितेको सीत समेत दियो । अनि भाजपाले पूर्वी भारतमा अनेकौं दलसँग गठबन्धन बनाएर जीत सुनिश्चित गरे । 

उत्तर प्रदेश र बंगालमा पहिले नै तयारी
उत्तर प्रदेशमा समाजवादी पार्टी र बहुजन समाज पार्टीको गठबन्धन बन्नुअघि नै भाजपाले राज्यमा ५० भन्दा बढी सीटका लागि कोशिश गर्न आरम्भ गरिदियो । पार्टीले केन्द्रको जनहित योजनाको आक्रामक प्रचार गर्‍यो र त्यसको लाभ पनि लियो । पार्टीको यो रणनीतिले काम गर्‍यो । पश्चिम बंगालका लागि भाजपाले सन् २०१७ देखि नै तयारी शुरू गरेको थियो । भाजपाको यो तयारी काम लाग्यो र पार्टीले ममताको गढ हल्लायो । 

विपक्ष विकल्पविहीन
प्रधानमन्त्री नरेन्द्र मोदीका अगाडि विपक्ष विकल्पहीन रह्यो । उनको टक्करमा कोही नेता नै भएन । कांग्र्रेस अध्यक्ष राहुल गान्धीले कुनै चुनौती नै प्रस्तुत गर्न सकेनन् । विपक्षीहरूबीचको कलहले मोदीलाई फाइदा भयो । 

शान्त मतदाता
कुनै हल्लाखल्ला नगरिकनै एक तप्काले प्रधानमन्त्री नरेन्द्र मोदीलाई भोट दियो । गृहिणीहरूले कसलाई भोट दिन्छौं भनेर अरूलाई बताउने गर्दैनन् । उज्ज्वला योजना लगायतका जनकल्याणकारी योजनाले गृहिणीहरूलाई खुशी तुल्यायो र उनीहरूले मोदीलाई भोट दिए । अनि डिजिटल स्पेसमा सक्रिय युवा मतदाताले मोदीबाहेक अरू उम्मेदवारलाई खासै चिनेन र उनैलाई भोट दियो ।