२५ करोड २६ लाखको लागतमा प्रदेशकै ठूलो धनगढी सिटी हल बन्दै

जेठ १३, २०७६

धनगढी- धनगढी उपमहानगरपालिका–८ धनगढी गाउँमा सुदूरपश्चिम प्रदेशकै सवैभन्दा ठूलो सुविधासम्पन्न धनगढी सिटी हल निर्माणको कार्यले गति लिएको छ । संघीय सरकारको २५ करोड २६ लाखको लागतमा निर्माणधिन सिटी हलको करिब एक साथ १ हजार जना अटाउने क्षमता रहेको छ ।

संघीय आयोजना कार्यान्वयन इकाई धनगढीका इन्जीनियर झंक बहादुर थापाका अनुसार निर्माणको जिम्मा पाएको 'बिकेवाई एमके रोयल जेबी' र सरकारबीच गत माघ २ गते सम्झौता भएको छ । जसको सम्झौता अनुसार आउँदो २०७८ असार ९ गते अर्थात ३० महिनाको अवधीमा निर्माण सम्पन्न हुने जनाइएको छ ।


ADVERTISEMENT

जसको हालसम्म ३० प्रतिशत प्रगति भएको इन्जीनियर थापाले जानकारी दिए । सिटी हलको लागि धनगढी उपमहानगरपालिकाले करिब १ विघा जमिन उपलब्ध गराएको छ । जसको १० कठ्ठा जमिनमा हल मात्रै बन्ने जनाइएको छ । आपांगमैत्री बन्न लागेको सिटी हलको अन्डरग्राउण्ड तथा हलको बेसमेन्टमा पार्किङको व्यवस्था रहनेछ ।

त्यस्तै, २ वटा हल बन्नेछन् । मुख्य तथा अडिटेरियम सभा हलमा ७ सय जना अट्ने क्षमता रहेको छ । भने अर्को सेमिनार हलको क्षमता २ सय १० जना अट्ने क्षमता रहेको छ । सिटी हलभित्रै प्रशासनिक कक्ष, चेन्जिङ रुम, अति विशिष्ट कक्षको व्यवस्था रहनुको साथै पर्याप्त खानेपानी, शौचालयको व्यवस्था रहने भएको छ ।

त्यस्तै, फायर फाइटिङ टीम रुम, बगैचासहित बन्ने हल व्यवस्थापनको जिम्मा भने धनगढी उपमहानगरपालिकाको रहने जनाइएको छ । धनगढी सुदूरपश्चिम प्रदेशको राजधानी समेत रहेको धनगढीमा ठूलो सभा, समारोहलगायत सार्वजनिक कार्यक्रम गर्न स्थल अभाव हुँदै आएको छ । हलको निर्माणले सो समस्याको समाधान हुने आपेक्षा गरिएको छ ।

जेठ १३, २०७६ मा प्रकाशित

लखन चाैधरी

लखन चौधरी लोकान्तरका लागि प्रदेश नम्बर ७ का प्रतिनिधि हुन् । 

लेखकबाट थप...

प्रतिक्रिया दिनुहोस