काठमाडौं – होर्मुजको स्ट्रेटमाथि इरानको जमीनबाट आकाशमा मार हान्ने क्षेप्यास्त्रले अमेरिकाको एक सैन्य ड्रोनलाई खसाएको अमेरिकी अधिकारीहरूले जनाएका छन् । 

इरानको इस्लामिक रेभोल्युसन गार्ड्स कोर्स (आईआरजीसी) ले इरानी हवाईक्षेत्रमाथि उडिरहेको ड्रोनलाई कुहमोबाराकमा खसाएको बताएको छ । 

आईआरजीसीका कमान्डर मेजर जनरल होसेन सलामीले यो घटनाले अमेरिकालाई स्पष्ट सन्देश दिएको बताएको सरकारी सञ्चारमाध्यममा छापिएको छ । 

अमेरिका र इरानबीच तनाव चर्किंदै जाँदा यो घटना भएको हो । 

सोमवार अमेरिकी रक्षा मन्त्रालयले उक्त क्षेत्रमा इरानी बलहरूको शत्रुतापूर्ण व्यवहारको जवाफ स्वरूप एक हजार अतिरिक्त सैनिकहरू तैनाथ गरेको बताएको थियो । 

अघिल्लो बिहीवार स्ट्रेट अफ होर्मुजभन्दा ठिक्क बाहिर ओमानको खाडीमा इरानले दुईवटा तेल ट्यांकर उडाएको अमेरिकाले आरोप लगाएको छ । इरानले यो आरोप अस्वीकार गरेको छ । 

बिहीवार बिहानै अमेरिकाको जासूसी ड्रोनले इरानको हवाईक्षेत्र अतिक्रमण गरेकाले त्यसलाई खसाएको आईआरजीसीले बताएको इर्ना समाचार संस्थाले रिपोर्ट दियो । 

बीबीसीबाट