काठमाडौं– गोरखा, धादिङ, नुवाकोट र रसुवाका २२ वटा गाउँपालिकाले जोग्राफिक इन्फरमेसन सिस्टम (जीआइएस) म्याप तयार गर्ने भएका छन् । बेलायती सहयोग नियोग (डिएफआइडी) अन्तरगतको पूर्णिमा कार्यक्रमको सहयोगमा चार जिल्लामा २२ गाउँपालिकाले जिआइएस म्याप तयार गर्न लागेका हुन् । 

गाउँपालिकामा भएका विकास निर्माण र भौतिक पूर्वाधारका आयोजनालाई डिजिटल म्यापीङ गर्न ती गाउँपालिकाका पदाधिकारी, कर्मचारी र प्राविधिकलाई तालिम दिइएको छ ।

गोर्खाको धार्चे गाउँपालिका उपाध्यक्ष फूलमाया गुरुङ भर्खरै बनेका पालिकाका नयाँ सरचनाको विकासका लागि जिआइएस महत्वपूर्ण हुने बताउँछिन् । ‘आफ्ना् गाउँपालिकामा भएका विकासका क्रियाकलापलाई जिआइएस मार्फत म्यापीङ गर्दा विकास निर्माणको काम प्रभावकारी ढंगले अगाडि बढ्ने विश्वास लिएका छौं,’ गुरुङले भनिन् । 

पूर्णिमाका बरिष्ठ पूर्वाधार विज्ञ इन्जिनियर रामबहादुर घिमिरेले जीआइएसले गाउँपालिकामा भइरहेका विकास निर्माणको कामबारे एकीकृत सूचना प्राप्त हुने विश्वास व्यक्त गर्छन् । 

‘कोही विकासे साझेदारले ती गाउँपालिकामा कुनै कार्यक्रम लैजान चाह्यो भने काठमाडौंमा बसेरै जीआइएस मार्फत त्यो क्षेत्रको अवस्थितीबारे जानकारी पाउन सक्छ’ घिमिरेले भने । प्राविधिक तालिम पछि पहिलो चरणमा २२ मध्ये १० गाउँपालिकाले काम शुरु गरिसकेका छन् ।

जीआइस मार्फत गाउँपालिकामा रहेका विद्यालय, सडक बाटो, स्वास्थ्य चौकी, खानेपानीका आयोजना लगायत अन्य पूर्वाधार र विकासबारे म्यापीङ गरिने छ । ‘यसका लागि गाउँपालिकामा विज्ञ टोली स्थापना गरेका छौं’ घिमिरेले भने । 

पूर्णिमा कार्यक्रमका वरिष्ठ सुशासन व्यबस्थापक सन्तोष विष्टले जीआइएस म्याप तयार गर्दा गाउँपालिकाका काम प्रभावकारी हुने बताउँछन् ।