काठमाडौं– राजमार्ग आसपासका होटलहरूले यात्रुलाई गुणस्तरहीन खाना/खाजा खुवाउने तथा ठगी गर्ने गर्छन् भन्ने आरोप नयाँ होइन ।

बर्सेनि यस किसिमको आरोप लाग्ने गर्छ । चाडबाड नजिकिँदा अनुगमन पनि हुन्छ, तर यस किसिमका अनुगमन र कारवाहीले अहिलेसम्म त्यस किसिमको मनलाग्दी रोकिएको छैन ।

वाणिज्य विभागले दशैंतिहारअघि बर्सेनि अनुगमन गर्ने गरेपनि यस वर्ष भने प्रहरीले समेत सादा पोशाकमा विशेष टोली खटाएको छ ।

दशैंको पूर्वसन्ध्यामा राजधानीबाट बाहिरिने यात्रुहरूको चाप बिस्तारै बढ्दै गरेको अवस्थामा वाणिज्य विभागसँगको समन्वयमा विशेष प्रहरी टोली खटिएको प्रहरी प्रवक्ता डीआईजी विश्वराज पोखरेलले बताए ।

राजमार्ग आसपासका होटल तथा खाजा पसलहरूको निगरानी गर्न मातहतका प्रहरी कार्यालयहरूलाई परिपत्र गरिएको प्रवक्ता पोखरेलले लोकान्तरलाई जानकारी दिए ।

‘यात्रुको स्वास्थ्यमा प्रतिकूल असर पर्नेगरी गुणस्तरहीन खाना खुवाएको भेटिएमा सम्बन्धित निकाय (वाणिज्य विभाग) सँगको समन्वयमा कानूनी दायरामा ल्याउँछौं,’ डीआईजी पोखरेलले भने ।

यसअघि पनि आवश्यकताअनुसार अनुगमन टोलीमा प्रहरी पनि सहभागी हुने गरेको थियो । राजमार्गका होटलहरूको अनुगमनका लागि नै भनेर सादा पोशाकमा प्रहरीको विशेष टोली खटिएको भने यो पहिलो पटक हो ।

४३ हजार प्रहरी परिचालन

चाडबाडमा हुने चोरी, डकैटी, झै–झगडा, जुवातास लगायतका घटना नियन्त्रणका लागि पनि प्रहरीले विषेश योजना ल्याएको छ ।

नेपाल प्रहरीले चाडबाडलाई मद्देनजर गरेर देशभरमा ४३ हजार प्रहरी खटाएको प्रवक्ता पोखरेलले जानकारी दिए ।

पोखरेलले भने, ‘चाडबाडलाई मद्देनजर गरेर ८ हजार २ सय स्थानमा प्रहरी टोली खटाइएको छ । देशभरका प्रहरीको बिदा समेत कटौती गरेर नागरिकको सुरक्षालाई विषेश प्रथामिकतामा राखेका छौं ।’

प्रहरीको अपिल– आफ्नो सुरक्षामा ध्यान दिनुस् !

अपराधीहरूले चाडबाडको मौका छोप्ने भएकाले आफ्नो सुरक्षामा नागरिक स्वयं पनि सचेत हुनुपर्ने प्रवक्ता पोखरेलको भनाइ छ । 

‘चाडबाडको समयमा नागरिकहरूले पर्व मनाउन ध्यान दिने भएकाले सुरक्षामा अलि कम ध्यान गएको देखिन्छ,’ उनले भने, ‘नागरिकले पनि आफ्नो सुरक्षामा ध्यान दिनुपर्छ ।’

घर छाडेर हिँड्दा चोरीका घटनाहरू समेत बढ्ने गरेकाले त्यसमा ध्यान दिन उनको सुझाव छ ।

साथै उनले मादक पदार्थ सेवनमा पनि सावधानी अपनाउन आग्रह गरे ।

‘दशैंतिहारमा मादक पदार्थ धेरै सेवन गर्दा झै–झगडा हुने भएकाले सेवन गर्दा विषेश ध्यान पुर्‍याउन अनुरोध गर्दछौं,’ प्रवक्ता पोखरेलले भने, ‘यस्ता कुरामा प्रहरीले निगरानी त गर्छ नै, तर नागरिकले पनि आफ्नो तहबाट सचेत भएमा यस्ता घटनाहरू कम हुन्छन्,’ प्रवक्ता पोखरेलले भने ।