काठमाडौं– कृषि विकास बैंकबाट रकम चोरी प्रकरणमा संलग्न रहेको आरोपमा अर्का एक व्यक्ति पनि पक्राउ परेका छन् ।

प्रतिक्षा निर्माण सेवाका प्रोप्राइटर रामकृष्ण भुसाललाई प्रहरीले कृषि विकास बैंक वालिङ शाखा स्याङ्जाबाट बिहीवार नियन्त्रणमा लिएको हो ।

उनको खातामा ६५ लाख रुपैयाँ ट्रान्सफर भएको प्रहरीले जानकारी दिएको छ ।

बैंकको सिस्टममा छिरेर विभिन्न व्यक्तिको नाममा रहेका खातामा ४ करोड ७३ लाख बराबर ट्रान्सफर भएको थियो ।

बैंकबाट विभिन्न खातामा ट्रान्सफर भएका रकममध्ये यो सबैभन्दा बढी रहेको दाबी प्रहरीले गरेको छ ।

ट्रान्सफर गरिएको रकम झिक्ने तथा त्यसका लागि सहयोग गर्ने १२ जनालाई प्रहरीले यसअघि नै पक्राउ गरिसकेको छ ।

उक्त प्रकरणका 'मास्टर माइन्ड' भने पक्राउ परेका छैनन् । घटनाका मुख्य अभियुक्त विदेशी नागरिक रहेको र उनी भारतमा रहेको प्रहरीको प्रारम्भिक अनुसन्धानमा खुलेको छ ।

महानगरीय प्रहरी अपराध अनुसन्धान महाशाखा टेकुमा बुधवार पत्रकार सम्मेलन गरी प्रहरीले ५ अर्ब चोरी गर्ने योजना आफूहरूले बिफल पारेको दाबी गरेको थियो ।