बाग्मती प्रदेशको भौतिक पूर्वाधार विकासमन्त्रीमा नियुक्त काठमाडौँका रामेश्वर फुँयालले सपथ ग्रहण गरेका छन् । सोमवार प्रदेश प्रमुख विष्णु प्रसाईंले फुयाँललाई हेटौंडामा सपथ ग्रहण गराएका हुन् ।

फुयाँललाई मुख्यमन्त्री डोरमणि पौडेलले मंगलवार भौतिक पूर्वाधार विकासमन्त्रीका रुपमा नियुक्त गरेका हुन् । 

यसअघि संविधानसभा सदस्यसमेत रहेका फुँयाल लामो राजनीतिक यात्रापछि पहिलोपटक मन्त्री बन्न लागेका हुन् । तत्कालीन भौतिक पूर्वाधार विकासमन्त्री केशव स्थापितलाई मुख्यमन्त्री पौडेलले वर्खास्त गरेपछि रिक्त रहेको मन्त्रालयको काम मुख्यमन्त्री पौडेल आफैँले सम्हाल्दै आएका थिए ।

वाग्मती प्रदेशको स्थायी राजधानी र नामाकरणपछि फुँयाल मन्त्री बन्ने चर्चा निकै चलेको थियो । वाग्मती प्रदेशका नेपाल कम्युनिष्ट पार्टी (नेकपा) प्रमुख सचेतक रहेका फुँयाल गाविस अध्यक्ष, जिल्ला विकास समितिको उपसभापति, संधिानसभा सदस्य, प्रदेशसभा सदस्य हुँदै मन्त्री बनेका हुन् ।

मुख्यमन्त्रीसँग विबादका कारण स्थापित २०७५ कात्तिक १६ गते विस्थापित भएका थिए । स्थापित विस्थापित भएको १५ महिना पछि भौतिक पुर्वाधार मन्त्रायले मन्त्री पाएको छ ।

२०७० सालको संविधानसभा निर्वाचनमा काठमाडौं ३ वाट प्रत्यक्ष निर्वाचित तथा प्रदेशसभा निर्वाचनमा काठमाडौं ३ क बाट प्रत्यक्ष निर्वाचित हुन् ।