अमेरिकाको न्युयोर्क शहरमा मार्च महिनाको अन्त्यतिर कोरोनाभाइरस फैलिएपछि माउन्ट सिनाइ अस्पतालका चिकित्सकहरूले रोगीहरूको रगतमा अनौठो कुरा भइरहेको देखे । 

रोगीहरूको विभिन्न अंगमा रगत बाक्लिएको र डल्लो परेको संकेत चिकित्सकहरूले पाए । भाइरसले यस्तो खतरनाक तरिकाले शरीरलाई ध्वस्त पार्ने रहेछ भन्ने कुरा त्यहाँका अनि अन्य ठाउँका चिकित्सकहरूले बुझे । 

माउन्ट सिनाइमा मिर्गौलारोग विशेषज्ञहरूले मिर्गौलामा रगत जमेर डल्लो परेको भेटे । फोक्सोरोग विशेषज्ञहरूले भेन्टिलेटरमा बसेका कोभिड–१९ रोगीहरूको फोक्सोका धेरै भागमा रगतै नभएको देखे । स्नायुचिकित्सकहरूले रगत जमेर डल्लो भएका कारण स्ट्रोकका रोगीको संख्या बढेको पाए । 

‘यो रोगले रगतका डल्ला बनाएको देख्दा आश्चर्य लाग्यो,’ माउन्ट सिनाइका न्युरोसर्जन डा जे मोच्चोले बताए । जवान रोगीलाई कोभिड–१९ को पहिलो लक्षण नै स्ट्रोक देखिएको केही चिकित्सकहरूले बताएका छन् । 

विभिन्न क्षेत्रका चिकित्सकहरूले आआफ्नो कुरा देखेपछि उपचारको नयाँ पद्धति विकास गरेका छन् । अब रोगीहरूले रगत जम्नुअघि नै रगत पातलो बनाउने औषधिको भारी डोज लिन थालेका छन् । 

‘शायद रगत डल्लो पर्न दिइएन भने रोग कम गम्भीर बनाउन सकिन्छ,’ डा डेभिड राइसले भने । तर उच्च जोखिममा रहेका केही रोगीहरूमा यो नयाँ उपचार लागू गरिनेछैन किनकि रगत पातलो बनाउँदा मस्तिष्क तथा अन्य अंगमा रक्तश्रावको सम्भावना बढ्छ ।