२१ असार २०८३, आइतबार
राष्ट्रिय सभा सदस्य दिलकुमारी रावल थापा 'पार्वती'ले लिपुलेक–कालापानीलगायतका क्षेत्रमा देखिएका सीमा विवाद तत्काल हल गर्न सरकारसँग माग गरेकी छन् ।
राष्ट्रिय सभाको आइतवारको बैठकमा बोल्दै सांसद रावलले कूटनीति तथा राजनीतिक पहलमार्फत समस्या समाधान गर्न माग गरेकी हुन् ।
'लिपुलेक, लिम्पियाधुरा, कालापानीलगायत दर्जनौं स्थानमा नेपाल–भारतबीच देखिएको सीमा विवाद तत्काल कूटनीतिक तथा राजनीतिक पहल अघि बढाएर सदाका लागि हल गर्न नेपाल सरकारसँग जोडदार माग गर्दछु,' उनले भनिन् ।
नेपालमात्र नभएर सिंगो विश्वले कोभिड– १९ को महामारी सामना गरिरहेका बेला नेपाली भूमिमा भारतले सडक सञ्जाल निर्माण गरेको विषयले सम्पूर्ण नेपालीलाई स्तब्ध बनाएको उनको भनाइ थियो ।
साथै उनले कोभिड– १९ सँग संघर्षरत नेपाली तथा विश्वभरका संक्रमितहरूलाई शीघ्र स्वास्थ्यलाभको कामना समेत गरिन् ।
विनियोजन विधेयकका सिद्धान्त र प्राथमिकताका विषयमा भएको छलफलमा आफ्नो धारणा राख्दै उनले वर्तमान विषम परिस्थितिको वस्तुनिष्ठ विश्लेषण गरेर तत्कालीन, मध्यकालीन र दीर्घकालीन सोचसहित संविधान, कानून र जनताको अपेक्षाअनुसार नीति तथा कार्यक्रम र सोअनुसार बजेटको व्यवस्था गर्न सरकारसँग माग गरिन् ।
सांसद रावलले शिक्षामा सरकारी लगानी अभिवृद्धि गरी अनलाइन एजुकेसनमा ध्यान दिन र स्वास्थ्यको वर्तमान स्थितिमा परिवर्तन तथा सरकारी अस्पतालमा लगानी वृद्धि गरी भरपर्दो, सर्वसुलभ र जनमुखी स्वास्थ्य सेवा लागू गर्न समेत सरकारसँग माग गरिन् ।
सांसद रावल राष्ट्रिय सभाको राष्ट्रिय सरोकार तथा समन्वय समिति सभापति समेत हुन् ।
