फेसन डिजाइनर काजल शर्मा विगत एक दशकदेखि यो पेसामा छिन् । काठमाडौंको कुपण्डोलमा ‘काजल क्रिएसन’ फेसन स्टुडियो सञ्चालन गर्दै आएकी शर्माले थुप्रै नेपाली चलचित्रमा फेसन डिजाइन गरिसकेकी छन् ।
चलचित्रमा मात्र होइन, उनी व्यत्तिगत रूपमा पनि नायिकाहरूको फेसन डिजाइन गर्छिन् । उनले डेढ दर्जनभन्दा बढी चलचित्र र २५० भन्दा बढी म्युजिक भिडियोमा फेसन डिजाइन गरिसकेकी छन् । चलचित्र तथा म्युजिक भिडियाको दृश्यबारे निर्देशकले जानकारी गराएपछि आवश्यक फेसन उनी आफैं डिजाइन गर्छिन् । आफूले काम गरेको फिल्मको अभिनेत्रीमध्ये पाँच अभिनेत्रीलाई कस्तो फेसन सुहाउँछ भन्नेबारे शर्माले राजधानीलाई जानकारी गराएकी छन् ।

प्रियंकालाई सारी, चोली र लेहंगा
काजलको हेराइमा अभिनेत्री प्रियंका कार्कीलाई सारी, चोली र लेहंगा चोली सुहाउँछ । अभिनेत्री प्रियंका ‘स्लिम’ छिन् । उनको शरीर निकै आकर्षक र उचाइ पनि त्यतिकै राम्रो छ । लाम्चो मोहडाको मुहार भएकी प्रियंकालाई सारीमा सबैभन्दा राम्री देखिने गरेको पनि काजलको भनाइ छ । उनले चलचित्र ‘छक्का पञ्जा’को शृंखलामा काम गर्दा प्रियंकाका लागि थुप्रै सारी चोली र लेहंगा बनाएकी थिइन् । हुन त यी नायिकालाई सबै प्रकारको कपडा सुहाउने भए पनि सारी, चोली र लेहंगामा उनी निकै आकर्षक देखिने गरेको पनि काजलको कथन छ । चलचित्र छक्का पञ्जा १ र छक्का पञ्जा २ मा सारीमा उनलाई साह्रै सुहाएको पनि काजलले बताएकी छन् ।

वर्षा राउतलाई लङ गाउन
काजल शर्माले अभिनेत्री वर्षा राउतसँग पनि काम गरिसकेकी छन् । अभिनेत्री वर्षाका लागि उनले थुप्रै म्युजिक भिडियोमा फेसन डिजाइन गरिसकेकी छन् । उनको हेराइमा अभिनेत्री वर्षा गोलो मोहडाकी छिन् । उचाइ र शारीरिक बनावटअुनसार राउतलाई सबैभन्दा बढी ‘लङ गाउन’ सुहाउने गरेको पनि काजलले बताएकी छन्, ‘वर्षाको फेस क्युट छ । शारीरिक बनोट पनि आफ्नै प्रकारको छ । विभिन्न पार्टी समारोहमा जाँदा उनलाई म लङ गाउनमै जान सल्लाह दिन्छु ।’

साम्राज्ञीलाई मिड टप्स र जिन्स
यस्तै, अभिनेत्री साम्राज्ञी राज्यलक्ष्मी शाह क्याजुअल ड्रेसमा आकर्षक देखिने गरेको काजलले बताएकी छिन् । स्लिम आकर्षक शारीरिक बनोटले गर्दा अभिनेत्री साम्राज्ञीलाई ‘लङ पिस’ मा पनि आकर्षक देखिने काजलको भनाइ छ । साम्राज्ञी जस्तो सुन्दर शरीर भएकालाई प्रायः सबै प्रकारको कपडा सुहाउने काजलले बताइन् । चलचित्र रातो टीका निधारमामा काम गर्ने क्रममा उनले साम्राज्ञीको ड्रेस सेन्सबारे बुझ्नो अवसर पाएकी हुन् ।
यस्तै, साम्राज्ञीलाई क्याजुअलमा ‘मिड टप्स’मा आउटरसहितको जिन्स साह्रै आकर्षक देखिने पनि काजलले बताइन् । क्याजुअल ड्रेसमा झन् स्मार्ट देखिने अभिनेत्री सामाज्ञीलाई पनि अर्की अभिनेत्री प्रियंका जस्तै सारी चोली राम्रो सुहाउने गरेको पनि यी डिजाइनरको कथन छ ।

केकीलाई सारी, चोलो र गाउन
अभिनेत्री केकी अधिकारीलाई क्याजुअल ड्रेसभन्दा गाउनमा आकर्षक देखिने गरेको पनि काजलको भनाइ छ । ‘केकीलाई कुनै पनि समारोहमा जाँदा लङ गाउनमा सजिएर जान म सिफारिस गर्छु । त्यसो त उनलाई मिड गाउन पनि सुहाउँछ । तथापि उनको शारीरिक बनोट हेर्दा लङ गाउन नै बढी आकर्षक देखिन्छ,’ काजलले भनिन्, ‘लक डगाउनको अल्टरनेटमा केकीलाई म सारी र चोलीको सिफारिस गर्छु । केकीलाई सारी र चोलीमा पनि त्यत्तिकै सुन्दर देखिन्छ ।’
चलचित्र ‘छ माया छपक्कै’ र थुप्रै भिडियोका लागि केकीको फेसन डिजाइन गर्ने क्रममा काजलले उनको फेसनबारे बुझ्ने अवसर पाएको बताइन् ।

वर्षालाई लङ मिडी, चोली र जमसुट
वर्षा शिवाकोटीको विभिन्न भिडियामा फेसन डिजाइन गरेको काजलले बताइन् । वर्षालाई जमसुट साह्रै सुहाउने गरेको उनले बताइन् । ‘वर्षालाई म जमसुट नै सिफारिस गर्छु,’ काजलले भनिन् । अभिनेत्री वर्षा शिवाकोटीलाई उनले लङ मिडी चोली पनि सिफारिस गरेकी छन् । राजधानी दैनिकमा खबर छ ।।