नेपाली कांग्रेसकी सांसद रंगमती शाहीले सांसद विकास कोषको रकम जनताको स्वास्थ्यमा खर्च गर्न माग गरेकी छन् ।

बुधवार बसेको प्रतिनिधि सभा बैठकको शून्य समयमा उनले भनिन्– ‘बीच बाटोमा अलपत्र परेकाले सोध्छन् हामीलाई कहिले उद्धार गर्ने हो ? हामी सरकारलाई सोध्छौं, परीक्षण गर्ने कीट र क्वारेन्टाइन अभाव छ, भन्छ ।’

‘जनताले फेरि सोध्छन्, ‘सांसद कोष केमा खर्च हुन्छ ? हामी भन्छौं, विकासमा हुन्छ । उनीहरूले भन्छन्, हामी बाँचे पो विकास देखौंला, हामी नबाँचे तपाईंले गरेका विकास धिक्कार हुनेछ,’ उनले भनिन् ।  

सांसद शाहीले विकास निर्माण गर्ने पाटोको अनुगमन गर्ने जिम्मा सांसदलाई दिन माग गर्दै भनिन्, ‘सांसदले कोष चलाउने होइन, होश चलाउने बेला हो ।’