सत्तारूढ दल नेपाल कम्युनिस्ट पार्टी (नेकपा)का महासचिव विष्णुप्रसाद पौडेलले रुपन्देहीमा भएको ५ जनाको सामूहिक हत्याको घटनाको भर्त्सना गर्दै विज्ञप्ति जारी गरेका छन् ।

मंगलवार एक विज्ञप्ति जारी गर्दै महासचिव पौडेलले भनेका छन्, 'म यस अपराधपूर्ण घटनाको घोर विरोध एवं भर्त्सना गर्दछु । यस्तो जघन्य अपराधबाट जीवन गुमाउनुहुने सम्पूर्ण मृतकहरू प्रति श्रद्धान्जली व्यक्त गर्दछु ।'

रुपन्देही जिल्लाको तिलोत्तमा नगरपालिका वडा नम्बर १० मैनहियास्थित गंगादेवी पशुफर्ममा सोमवार राति ४० वर्षीय माधव मुसहर, ३७ वर्षीय जानकी मुसहर, १४ वर्षीय पोषराज मुसहर, १७ वर्षीय करन चौधरी र १७ वर्षीय आशिष चौधरीको त्रासदीपूर्ण एवम् विभत्स हत्या भएको थियो ।

पौडेलले यस हत्याकाण्डको यथाशीघ्र अनुसन्धान गरी सत्य–तथ्य पत्ता लगाउन र दोषी उपर कडाभन्दा कडा कारबाही गर्न नेपाल सरकारका सम्बद्ध निकायको गम्भीर ध्यानाकर्षण गराएका छन् । उनले मृतकका परिवारलाई उचित राहत एवम् क्षतिपूर्तिको व्यवस्था गर्नसमेत माग गरेका छन् ।

'समाजमा डरलाग्दो ढंगले देखापरिरहेको यस प्रकारको आपराधिक मनोवृति फैलिन नदिन र नागरिकलाई सुरक्षाको प्रत्याभूति गर्न समेत सम्बद्ध निकायको ध्यानाकर्षण गराउँछु,' पौडेलले विज्ञप्तिमा भनेका छन् ।