सन् २०१५ मा पाकिस्तानले निकाल्ने २० रुपैयाँको सिक्कामा चीनको झण्डा अंकित गर्यो । पाकिस्तानको स्टेट बैंकले स्मारक सिक्काका रूपमा चीन र पाकिस्तानको मैत्री सम्बन्धलाई दर्शाउन यो कदम उठाएको थियो ।

सन् २०१५ लाई चीन र पाकिस्तानका बीचमा 'मित्रताको आदानप्रदान वर्ष' मानिएको थियो ।

एउटा देशको सिक्का या नोटमा अर्को देशको झण्डा अंकित गर्ने काम विश्वभर विरलै हुन्छ । तर चरम आर्थिक अभावमा गुज्रिरहेको पाकिस्तानलाई चीनले आर्थिक सहयोग गरिरहेको छ ।

दक्षिण एसियामा भारतसँग ठूलो दुश्मनी रहेको पाकिस्तानका जनताले चीनसँग पाकिस्तानको सम्बन्धलाई राम्रो नजरले हेर्ने गर्छन् ।

सिक्काको बीचमा दाहिनेतिर पाकिस्तानको झण्डा छ भने बायाँतिर चीनको झण्डा छ । त्यसको वरिपरी 'एयर अफ फ्रेन्ड्ली एक्सचेन्ज २०१५' लेखिएको छ ।

चिनियाँ झण्डा अंकित गर्ने पाकिस्तानको यो कदमको भारतमा विरोध भएको थियो । दक्षिण एसियामा चीनलाई जबर्जस्ती प्रवेश गराउन खोजेको भन्दै भारतीय सञ्चारमाध्यमहरूले समाचार लेखेका थिए ।

पाकिस्तानले विगत ४० वर्षमा केही दर्जन मात्र यस्ता स्मारक सिक्काहरू निकालेको छ ।