प्रतिनिधि सभाका सांसदहरूले अनिवार्यरूपमा कोरोना भाइरसविरुद्धको खोप लगाउनुपर्ने भएको छ ।

फागुन २३ गते बस्ने प्रतिनिधि सभाको बैठकमा प्रवेश गर्नुअघि सांसदहरूले अनिवार्यरूपमा कोरोना विरुद्धको खोप लगाउनुपर्ने भएको हो ।

सांसदलाई फागुन १९, २० र २१ गते सिभिल अस्पतालमा खोप लगाउने कार्यक्रम तय गरिएको छ । प्रतिनिधि सभाका सभामुख अग्नि सापकोटाले बुधवार कोरोना भाइरस विरुद्धको खोप लगाउने उनका प्रेस सल्लाहकार श्रीधर न्यौपानेले बताए ।

प्रतिनिधिसभामा २७५ सदस्य रहे पनि हाल २६९ जना मात्र सांसद रहेका छन् । सभामुख सापकोटाको मतदानमा सहभागी नहुने र नेकपाका सांसद सानु सिवाको मृत्यु भएको छ ।

प्रमुख प्रतिपक्षी दल नेपाली कांग्रेसका २ जना र जनता समाजवादी पार्टीका २ जना सांसद निलम्बनमा परेका छन् । 

माघ १४ गतेबाट नेपालमा कोरोना भाइरस विरुद्धको खोप लगाउन शुरू गरेको १ महिनापछि सांसदहरूले खोप लगाउने भएका छन् । नेपालमा हालसम्म ४ लाख २९ हजार जनाले कोरोना विरुद्धको खोप लगाइसकेका छन् ।

नागरिकहरूले कोरोना विरुद्धको खोप लगाइरहे पनि राष्ट्रपति, उपराष्ट्रपति, प्रधानमन्त्री र मन्त्रीहरूले भने अझै कोरोनाविरुद्धको खोप लगाएका छैनन् ।

यसअघि कोरोनाको कारण संसद् बैठकमा प्रवेश गर्नका लागि संसद् सचिवालयले सांसदहरुले अनिवार्यरूपमा पीसीआर परीक्षण गरेर मात्र प्रवेश गराएको थियो । यसपटक भने खोप लगाएर मात्र प्रवेश गर्न दिने प्रावधान बनाएको छ ।

संसद् सचिवालयका अनुसार सांसद, संसद् सचिवालयका कर्मचारी र मर्यादापालकका लागि खोप अनिवार्यरूपमा लगाउनुपर्ने बताएको छ ।

सभामुख अग्निप्रसाद सापकोटाले फागुन २३ गते बस्ने प्रतिनिधि सभाको बैठकअघि विभिन्न दलका नेता र कार्यव्यवस्था परामर्श समितिमा छलफल गर्नुहुने भएको छ । संसद् बैठको मिति नजिकिँदै जाँदा सभामुखको सक्रियता पनि बढेको छ ।

उनले मंगलवार प्रतिनिधि सभाको बैठक कक्षको तयारीको अवस्थाबारे अवलोकन गरेका छन् । संसद् भवन नयाँबानेश्वरको अवलोकनपछि सभामुख सापकोटाले सम्बद्ध सबै पक्षसँग छलफल गरेर बैठकलाई अगाडि बढाउने बताए ।

‘सर्वोच्चको फैसला खुशी र गौरवको विषय भएको हो, संसद् अधिवेशनलाई स्वभाविक लयमा सञ्चालन गरिन्छ,’ उनले भने, ‘केही समय संसद् अवरुद्ध भएकाले खल्लो महसूस भए पनि अहिले सबैमा उत्साह जागेको छ ।’

राजनीतिकरूपमा २ धारमा नेकपा विभाजन भए पनि कानूनीरूपमा अझै पनि निर्वाचन आयोगले आधिकारिकता नदिँदा प्रतिनिधिसभाको बैठकमा प्रधानमन्त्री ओली पक्षीय नेकपा र प्रचण्ड–नेपालपक्ष नेकपाबीच टकराब हुने देखिएको छ । नेपाल समाचारपत्र दैनिकमा खबर छ ।