संविधानको धारा ७६(५) अनुसारको सरकार गठन प्रक्रिया र प्रतिनिधिसभा विघटविरुद्ध परेका रिटमाथि सर्वोच्च अदालतमा सुनुवाइ शुरू भएको छ ।

प्रधानन्यायाधीश चोलेन्द्रशमशेर जबराको एकल इजलासमा बिहीवार सुनुवाइ शुरू भएको हो ।

बिहीवारको बहसमा रिट निवेदकका तर्फबाट १ जनालाई मात्र बहस गर्न दिइएको अधिवक्ता लोकेन्द्र ओलीले जानकारी दिए । 

१९ वटा रिटलाई एकै ठाउँमा राखेर बहस भइरहेको छ । शुरूआती बहस गरेका वीरभद्र जोशीले धारा ७६(५) को सरकार गठन गर्न राष्ट्रपतिले गरेको आह्वान प्रक्रियासम्मत नभएको जिकीर गरे । 

जोशीले सर्वोच्च अदालतको यसअघिको आदेश अनुसार पनि प्रतिनिधिसभा विघटन गर्न नमिल्ने भएकाले प्रथमदृष्टिमै बदरभागी रहेको जिकीर गरे । 

दिउँसो साढे १२ बजेसम्म दोस्रो रिट निवेदक अजय बुढाथोकीले बहस गरिरहेका छन् । विघटित प्रतिनिधि सभाका बहुमत सदस्यले दायर गरेको लगायत अन्य ११ वटा रिटमाथि भोलि शुक्रवारदेखि संवैधानिक इजलासमा सुनुवाइ हुने सर्वोच्च प्रशासनले जनाएको छ । 

मन्त्रिपरिषद्को सिफारिसमा राष्ट्रपति विद्यादेवी भण्डारीले जेठ ७ गते प्रतिनिधिसभा विघटन गरेर कात्तिक र मंसिरका लागि प्रतिनिधि सभाको चुनावको मिति घोषणा गरेकी छन् ।