अमेरिकाको नोभाभ्याक्स कम्पनीले कोरोनाका विरुद्ध बनाएको खोपको प्रभावकारिता ९०.४ प्रतिशत देखिएको छ र यस खोपलाई भारतको सिरम इन्स्टिच्युटले उत्पादन गर्ने भएको छ । 

अमेरिका र मेक्सिकोमा २९ हजार ९६० जनामा गरिएको परीक्षणमा यो खोप फाइजर र मोडर्नाकै तुलनामा आएको छ भने जोनसन यान्ड जोनसनभन्दा यसको प्रभाव राम्रो देखिएको छ । 

भारतले अन्तरिम डेटाका आधारमा अघि बढ्दै खोपलाई स्वीकृति दिन सक्ने बताइएको छ । भारत सरकारको अनुमानमा सेप्टेम्बरदेखि डिसेम्बर महिनाको बीचमा नोभाभ्याक्सका २० करोड शटहरू उपलब्ध गराउन सकिनेछ । 
 

नोभाभ्याक्स इन्कले सोमवार आफ्नो खोप कोभिडविरुद्ध ९० प्रतिशतभन्दा बढी प्रभावकारी देखिएको र सबै भेरिएन्टलाई रोक्न समर्थ रहेको बताएको छ । 
 

नोभाभ्याक्सलाई भारतमा कोराभ्याक्स नाम दिइएको छ र भारतमा यसको दोस्रो तथा तेस्रो चरणको परीक्षण गरिँदैछ । सिरम इन्स्टिच्युटले १८ वर्षभन्दा माथिका १६ सय सहभागीलाई परीक्षणमा राखेको छ । सिरमले बालबालिकामा पनि परीक्षण गर्ने इच्छा व्यक्त गरेको छ । 

यो खोप आरम्भ गर्ने भारत पहिलो मुलुक हुन सक्छ । 

‘परिणामहरू उत्साहजनक छन् र हामी खोप ल्याउने विषयमा उत्सुक छौं । सिरमसँग मिलेर हामीले आपूर्तिका लागि कोशिश गरिरहेका छौं र कम्पनीले आईसीएमआरसँग मिलेर परीक्षण गरिरहेको छ । यो निकै बलियो खोप जस्तो लागेको छ र भारतमा नियमनका लागि आँकडा सुम्पन सफल हुनेछौं,’ एक भारतीय अधिकारीले बताए । 

यो अमेरिकाको चौथो खोप हो र यसको उपयोगितालाई विज्ञहरूले प्रशंसा गरेका छन् ।