नेकपा एमालेमा माधवकुमार नेपाल पक्षका अधिकांश सांसदले प्रधानमन्त्री शेरबहादुर देउवालाई विश्वासको मत दिने भएका छन् । 

एमालेको विवाद मिलाउने कार्यदलमा रहेका केही नेताले १० बुँदे सहमतिअनुसार पार्टीको विवाद मिलाउनेतर्फ जानुपर्ने बताएका भए पनि धेरैले संसद्, लोकतन्त्र र संविधान जोगाउन देउवालाई विश्वासको मत दिनुपर्ने पक्षमा छन् ।

नेपाल पक्षका नेता विरोध खतिवडाले त एमालेबाट ४० जना सांसदले प्रधानमन्त्री देउवालाई विश्वासको मत दिने दाबी गरे । ‘अदालतको फैसला आएदेखि नै हामी संसद् जोगाउनु पर्छ भनेर लागेका छौं । सुरूदेखिको अभियानमा कुनै फेरबदल भएको छैन । एमालेबाट ४० जनाले प्रधानमन्त्रीलाई विश्वासको मत दिनेछन् ।’

विवाद समाधान कार्यदलमा रहेका नेताहरू भीम रावल, सुरेन्द्र पाण्डेलगायतका नेताहरू संस्थागत निर्णय गरेर जानुपर्ने बताइरहे पनि धेरै सांसदले भने पक्षमा मत दिने भएका छन् । 

एमालेका वरिष्ठ नेता माधव नेपाललाई भेट्न गएका कार्यदलका सदस्यहरूलाई माधव नेपाल स्वंयले आफू एक्लै भए पनि देउवालाई विश्वासको मत दिने प्रतिक्रिया दिएर पठाएका छन् । रामकुमारी झाँक्रीले देउवालाई विश्वासको मत दिनु आफूहरूको कर्तव्य भएको बताएकी छन् ।

सांसद झपट रावलले आफूहरूको कार्यभार संसद्को निरन्तरता र आत्मसम्मानसहितको पार्टी एकता रहेको बताएका छन् ।  

त्यससँगै, सांसदहरू विरोध खतिवडा, मेटमणि चौधरी, सरला यादव, जीवनराम श्रेष्ठ, कृष्णलाल महर्जन, कल्याणी खड्का, मुकुन्द न्यौपाने, कलिला खान, यज्ञराज सुनुवार, दीपकप्रकाश भट्ट, निरा जैरू, पुष्षा कर्ण कायस्थहरू प्रधानमन्त्री देउवाको पक्षमा मत हाल्न तयार छन् । 

सांसद मेटमणि चौधरीले ३५ भन्दा बढी एमाले सांसदले प्रधानमन्त्री देउवाको पक्षमा विश्वासको मत दिने दाबी गरेका छन् । 

नेपाल समूहमा रहेका भीम आचार्यले भने एमाले फुटाउने उद्देश्यले हतारमा प्रधानमन्त्रीले विश्वासको मत लिन लागेको प्रतिक्रिया दिएका छन् ।