१६ असार २०८३, मंगलबार
लगातारको वर्षाका कारण जयपृथ्वी राजमार्ग अवरुद्ध भएको छ ।
राजमार्ग अन्तर्गत बैतडीको पाटन नगरपालिका–८ झौलेकमा सडक भासिँदा सवारी आवतजावत अवरुद्ध भएको हो ।
सडक भाँसिएर भत्किएकोले बिहानदेखि राजमार्ग पूर्ण रूपमा अवरुद्ध भएको बैतडीका प्रहरी प्रवक्ता प्रहरी निरीक्षक बोधराज ओझाले जानकारी दिए ।
आइतवार साँझदेखि आंशिक रूपमा बन्द रहेको राजमार्ग सोमवार बिहानदेखि पूर्ण रूपमा बन्द रहेको छ ।
भाँसिएको सडक भत्काएर किनारबाट पर्खाल लगाउने कार्य भइरहेको प्रवक्ता ओझाले जानकारी दिए । उनले भने, ‘पर्खाल निर्माण गर्न २/३ दिन लाग्ने देखिएको छ, त्यसपछि मात्रै राजमार्ग सञ्चालनमा आउँछ ।’
राजमार्ग अवरुद्ध हुँदा बझाङ भित्रिने र बझाङबाट काठमाडौं, धनगढी, महेन्द्रनगर, डडेल्धुरा, बैतडी लगायतका स्थानका लागि छुटेका १०० भन्दा बढी सवारीसाधन रोकिएपछि यात्रु अलपत्र परेका छन् ।
वर्षात्को समयमा पहिरोका कारण जयपृथ्वी राजमार्ग बेलाबेला अवरुद्ध हुने गरेको छ ।
