सभामुखले एमसीसी रोक्नुभएको हो, अब के गर्नुहुन्छ हामी हेर्छौं– ईश्वर पोखरेल

नेकपा एमालेका महासचिव ईश्वर पोखरेलले एमसीसी संसद्मा ल्याउन सभामुख अग्निप्रसाद सापकोटालाई नै चुनौती रहेको बताएका छन् ।

विराटनगरमा आइतवार सञ्चारकर्मीहरूसँग कुरा गर्दै पोखरेलले भने– ‘हिजो सभामुखले नै रोक्नुभएको थियो, अब के भनेर अगाडि बढाउनुहुन्छ, हामी हेर्छौं ।’

पोखरेलले एमसीसीका विषयमा पार्टीभित्र छलफल नभएको पनि बताए । संसद्मा सभामुखको भूमिका हेरेर अगाडि बढ्ने उनको भनाइ थियो ।

‘हिजो एमाले नेतृत्वको सरकारले एक किसिमको धारणा बनाएको थियो,’ पोखरेलले भने, ‘अब उहाँ (सभामुख) कसरी अगाडि बढ्नुहुन्छ, हामी पनि त्यही अनुसारको रणनीति बनाएर अगाडि बढ्छौं ।’

उनले प्रदेश १ का मुख्यमन्त्री भीम आचार्य र बाग्मती प्रदेशका मुख्यमन्त्री अष्टलक्ष्मी शाक्यले विश्वासको मत पाउने दाबी समेत गरे ।

‘उहाँहरूले विश्वासको मत प्राप्त गर्नु हुन्छ भन्नेमा म ढुक्क छु,’ पोखरेलले भने, ‘विश्वासको मत नदिनेहरू आफैँ नांगिएर जानेछन् ।’

पोखरेल मोरङको सुन्दरहरैचामा नेकपा एमालेको कार्यकर्ता भेलालाई सम्बोधन गर्न आएका हुन् ।

मोरङ क्षेत्र नम्बर ३ मा एमाले भन्दा नेकपा एकीकृत समाजवादीका पक्षमा धेरै कार्यकर्ता खुलेको सूचना पाएपछि एमालेले त्यही क्षेत्रमा भेला गरेको बुझिएको छ ।