प्रधानमन्त्री शेरबहादुर देउवाले आज दिउँसो ४ बजे मन्त्रिपरिषद्को बैठक बोलाएका छन् । प्रधानमन्त्री निवास बालुवाटारमा बस्ने गरी बोलाइएको बैठकबाट राजनीतिक दलसम्बन्धी अध्यादेश फिर्ता लिने निर्णय गर्ने तयारी छ ।

सत्तारूढ पाँच दलीय गठबन्धनमा राजनीतिक दलसम्बन्धी अध्यादेश फिर्ता लिएर मन्त्रिपरिषद् विस्तार गर्ने सहमति भएसँगै प्रधानमन्त्रीले निर्णय गराउन लागेका हुन् । 

असोज १० मा बालुवाटारमै बसेको सत्तारूढ गठबन्धनको बैठकले राजनीतिक दलसम्बन्धी अध्यादेश फिर्ता लिने सहमति गरेको थियो । 

उक्त अध्यादेश फिर्ता नभई मन्त्रिपरिषद् विस्तार हुँदा गठबन्धनमा रहेको सत्ता सहयात्री दल जनता समाजवादी पार्टी फुट्ने र फिर्ता लिइहाल्दा एकीकृत समाजवादीविरुद्ध अदालतमा रहेको मुद्दामा असर पर्ने भएपछि गठबन्धन अलमलिएको थियो । 

प्रधानमन्त्री शेरबहादुर देउवाले जिम्मेवारी लिएको ७० दिनभन्दा बढी भइसक्दा पनि मन्त्रिपरिषद् विस्तार हुन सकेको छैन । असार २९ गते प्रधानमन्त्रीसँगै चार जना मन्त्रीले शपथ ग्रहण गरेका थिए । 

त्यसपछि देउवाले साउन १० मा स्वास्थ्य राज्यमन्त्रीमा उमेश श्रेष्ठलाई नियुक्त गरेका थिए भने असोज ६ गते डा. नारायण खड्कालाई परराष्ट्र मन्त्री नियुक्त गरेका थिए ।