ब्राजिलका फूटबल खेलाडी नेयमारले अर्को वर्ष कतारमा हुने विश्वकप आफ्नो अन्तिम हुन सक्ने बताएका छन् । 

विगत ११ वर्षमा ब्राजिलका लागि १०० भन्दा बढी खेल खेलेका नेयमार पेलेपछिका सर्वाधिक गोलकर्ता ब्राजिली खेलडाी हुन् । 

‘मेरो अन्तिम विश्वकप यही भएको मलाई लाग्छ,’ नेयमारले आफूमाथि बनेको नयाँ वृत्तचित्रमा बताए । ‘त्यसपछि पनि फूटबल खेलिरहने मानसिक शक्ति मसँग हुनेछ कि छैन भन्ने कुरा मलाई थाहा छैन ।’

‘त्यसैले आगामी विश्वकपमा राम्रो प्रदर्शनका लागि म जे गर्न पनि तयार छु । देशलाई जीत दिलाउन म सबैथोक गर्नेछु । मैले सानो हुँदादेखि देखेको सपना साकार पार्न लागिपर्नेछु । म यसमा सफल हुन्छु भन्ने आशा छ ।’

पछिल्ला दुई विश्वकपमा सेमीफाइनल र क्वार्टरफाइनलबाटै बाहिरिएको ब्राजिल अहिले दक्षिण अमेरिकाको क्वालिफाइङ समूहको शीर्ष स्थानमा छ । १० वटा खेलमा उसले २८ अंक प्राप्त गरेको छ ।