नेपाल बार एसोसिएसनका अध्यक्ष चण्डेश्वर श्रेष्ठले प्रधानन्यायाधीश चोलेन्द्र शमशेर जबराको राजीनामा नआउञ्जेल आफूहरूको आन्दोलन नरोकिने बताएका छन् ।

जबरा रहेसम्म न्यायालयमा सुधार हुन नसक्ने भएकाले राजीनामा नै मुख्य शर्त रहेको श्रेष्ठले बताए । 

प्रधानन्यायाधीशलाई सर्वोच्च अदालत प्रवेशमा रोक लगाउन भन्दै बारले आयोजना गरेको धर्नाअघि कानून व्यवसायीहरूलाई बार परिसरबाट सम्बोधन गर्दै श्रेष्ठले न्यायपालिकाको माया भए राजीनामा गर्न ढिला नगर्न आग्रह गरे ।

‘हाम्रो दबाबका कारण गठन गरिएको समितिले दिएको प्रतिवेदन कार्यान्वयन नगर्ने बताएपछि त्यही दिनबाट हामीले आन्दोलन शुरू गरेका छौं । न्यायपालिका सुधारको बाधक चोलेन्द्र रहँदासम्म सुधार हुँदैन,’ श्रेष्ठले भने, ‘हामी सडकमा जान चाहेका थिएनौं, सर्वोच्च प्रवेश गर्ने गेट बन्द गरेका कारण मात्र हामी सडकमा गएका हौं । सर्वोच्च हाम्रो मन्दिर हो, यहाँभित्र कसैले रोक्न सक्दैन । रोक्ने हिम्मत कसैसँग छैन ।’ 

श्रेष्ठले प्रधानन्यायाधीशलाई सर्वोच्च प्रवेशमा रोक लगाउन सांकेतिक रूपमा बिहान साढे ११ सम्म धर्ना दिने बताए ।

‘विश्वमा कहीँ पनि न्यायालयभित्र सुरक्षाकर्मी र हतियार हुँदैन । यहाँ हतियार सहितका सुरक्षाकर्मी राखेको छ । आज झुकेर बारतर्फको ढोका खोलेको छ,’ श्रेष्ठले भने । 

त्यसपछि बारका पदाधिकारीसहितका कानून व्यवसायीहरू सर्वोच्च अदालत परिसरमा धर्नामा बसेका छन् ।

सर्वोच्चभित्र जारी धर्नामा वरिष्ठ अधिवक्ता कृष्णप्रसाद भण्डारी, पूर्वसभामुख समेत रहेका दमननाथ ढुंगाना लगायत सहभागी छन् । 

बारले अवरोध गरेपछि शुक्रवार प्रधानन्यायाधीश जबरा महान्यायाधिवक्ता कार्यालयसँगै रहेको वैकल्पिक गेटबाट अदालत प्रवेश गरेका थिए ।