१४ असार २०८३, आइतबार
निर्वाचन आयोगले राष्ट्रिय सभा सदस्य निर्वाचनका लागि निर्वाचन तालिका सार्वजनिक गरेको छ । आयोगले आगामी पुस २० गते राष्ट्रिय सभा सदस्यको उम्मेदवारी दर्ता गर्नुपर्ने गरी कार्यतालिका बनाएको हो ।
आगामी माघ १२ गते हुने राष्ट्रिय सभा सदस्य निर्वाचनका लागि पुस २० गते उम्मेदवारी दर्ता गर्नुपर्ने आयोगका सहसचिव एवम् प्रवक्ता शालिग्राम शर्मा पौडेलले बताए ।
त्यसै गरी २१ गते उम्मेदवारीमा दाबी विरोधको उजुरी दिने, २२ र २३ गते उजुरीमाथि जाँचबुझ गरी निर्णय गर्ने कार्यतालिका आयोगले बनाएको छ ।
पुस २४ गते उम्मेदवारले नाम फिर्ता लिने र २५ गते उम्मेदवारको अन्तिम नामावली प्रकाशन गर्ने कार्यतालिका रहेको पौडेलले बताए ।
आयोगले पुस २५ गते नै उम्मेदवारलाई निर्वाचन चिह्न प्रदान गर्ने तयारी गरेको छ । माघ १२ गते बिहान ९ बजेदेखि अपराह्न ३ बजेसम्म मतदान गर्ने व्यवस्था आयोगले गरेको छ ।
निर्वाचनमा भाग लिन चाहने दलले पुस १ गतेदेखि १० गतेसम्म दल दर्ता गर्न पाउनेछन् ।
