२१ जेठ २०८३, बिहीबार
रूपन्देहीको सैनामैना नगरपालिकाका एक पुरूषले आफ्नै श्रीमतीलाई धारिलो हतियार प्रहार गरेर हत्या गरेका छन् ।
सैनामैना–८ का सन्तबहादुर घर्तीले ३६ वर्षीया खुमालाई शुक्रवार खुकुरी प्रहार गरी हत्या गरेको जिल्ला प्रहरी कार्यालय रूपन्देहीले जानकारी दिएको छ ।
रूपन्देही प्रहरी प्रवक्ता डीएसपी नवरत्न पौडेलले खुकुरी प्रहार गरी खुमाको हत्या गरेको खुलेको जानकारी दिए ।
प्रहरीका अनुसार शुक्रवार बिहान बुटवल–११ स्थित दिदीको घरमा आएका बेला सन्तबहादुरले खुमाको घाँटीमा खुकुरी प्रहार गरी गम्भीर घाइते बनाएका हुन् ।
खुकुरी प्रहारबाट गम्भीर घाइते खुमाको उपचारको लागि लुम्बिनी प्रादेशिक अस्पताल, बुटवल लैजाँदै गर्दा बाटोमै मृत्यु भएको डीएसपी पौडेलले बताए ।
श्रीमतीमाथि खुकुरी प्रहार गरेपछि फरार भएका सन्तबहादुरलाई प्रहरीले नियन्त्रणमा लिएको छ ।
प्रहरीका अनुसार उनीहरूबीच केही समयदेखि पारिवारिक द्वन्द्व चलिरहेको थियो ।
