३१ असार २०८३, बुधबार
गत पुस १ गते दिउँसो चितवनको भरतपुरबाट काठमाडौंका लागि उडेको बुद्ध एयरको जहाज उडेको केही समयमै भरतपुर विमानस्थलमा आकस्मिक अवतरण गरिएको थियो ।
अवतरणका क्रममा सबै यात्रु सुरक्षित थिए । बुद्ध एयरले जहाजको दुई इञ्जिनमध्ये बायाँ इञ्जिनमा प्राविधिक समस्या आएपछि आकस्मिक अवतरण गर्नुपरेको बताएको थियो ।
सो घटनालाई लिएर अहिलेसम्म पनि सामाजिक सञ्जालमा विभिन्न प्रश्न उठिरहेका छन् ।
के भएको थियो सो दिन ? बुद्ध एयरकी एयर होस्टेस (विमान परिचारिका) अलिशा गुरुङको अनुभव जस्ताको तस्तै :
०००
मिति: १६ डिसेम्बर
समय दिउँसो: १ः१५ बजे
स्थान: भरतपुर विमानस्थल
जहाज: ९ एन–एईई
उडान नम्बर: ३६०
०००
जहाजमा १९ जना यात्रु रहेका थिए, जसमा १७ जना वयस्क, १ जना बच्चा र एक नाबालक ।
जहाजमा क्याप्टेन प्रमेश भक्त जोशी, को–पाइलट विजय महर्जन र म (अलिशा गुरुङ) थियौँ ।
त्यो दिन पहिलो उडान बिहान ६ः५० मा काठमाडौं–भरतपुरको थियो । त्यसपछि ८ः५० को उडान तुम्लिङटारको थियो ।
त्यो दिन त्यहाँ मौसम नखुलेर डिले भयो । त्यहाँ ढिला खुलेका कारण भरतपुर जान ढिलाइ भयो ।
भरतपुर पुग्ने शेड्युल ११ः५० को थियो । तर तुम्लिङटारबाट जान ढिला भयो ।
पछि भरतपुरबाट १ः१५ मा उडान गर्ने समय थियो ।
भरतपुरबाट हामी काठमाडौं उडानका लागि तयार भयौँ ।
जहाज उडान हुनुपूर्व हामीले सबै चेकजाँच गर्यौँ ।
त्यसपछि १९ जना यात्रुलाई जहाजमा राख्यौँ ।
जहाज उड्नका लागि अब तयारी अवस्थामा थियो ।
त्यस्तै १ बजेर १५ मिनेट गएको थियो । जहाज उड्यो ।
जहाजले उडान शुरू गरेको केही मिनेटमै अस्वाभाविक आवाज आयो ।
जहाज भित्रका सबैले त्यो सुनेका थिए । मैले पनि सुनेँ ।
तर के भएको हो मलाई थाहा थिएन ।
आवाज आएपछि पनि म एकछिन चुपचाप नै बसें । सरहरू (चालक दलका सदस्य)ले केही नभनीकन मैले कुनै पनि जानकारी दिन मिल्दैन ।
उहाँहरूले केही नभनीकन म उठ्ने कुरा आएन ।
त्यसपछि मलाई पनि मेरो सरले अगाडि बोलाउनुभयो । म अगाडि गएँ ।
सरले जहाजमा प्राविधिक समस्या छ, हामी अब ल्याण्ड गर्छौँ भन्नुभयो ।
आवाज आएको केही समयभित्र नै मैले प्यासेन्जरलाई ब्रिफ गरें ।
जहाजको अवस्था सबै सामान्य नै थियो । जस्ट एकैपटक आवाज आयो, चलिरहेको इन्जिन बन्द भयो ।
मैले यात्रुलाई जहाजमा टेक्निकल प्रब्लम आएको छ, हामी भरतपुरमै ल्यान्ड गर्छौँ,’ भनेर ब्रिफ गरें ।
मैले उहाँहरू सबैलाई सामान्य प्रब्लम भएको र नआत्तिन अनुरोध गरिरहेको थिएँ ।
त्यसको केही मिनेटमै जहाज ल्याण्ड गरियो ।
०००
म बुद्ध एयरमा आवद्ध भएको साढे ४ वर्ष भयो । यस्तो घटना पहिलोपटक घटेको थियो ।
अहिले सामाजिक सञ्जालमा सो घटनालाई लिएर निकै चासो दिनुभएको छ ।
चासो दिनु स्वाभाविक पनि हो । तर ठूलै घटना भने घटेको होइन ।
यो घटना घटेको पुस १ गते हो । घटना घटेपश्चात निकै नै नकारात्मक प्रचारहरू गरिएको छ ।
बुद्ध एयरले यात्रुहरूको सुरक्षालाई सधैं प्राथमिकतामा राखेको छ ।
हामी सबै तालिमप्राप्त नै छौँ ।
यात्रुहरूलाई केही हानी नोक्सानी वा असुरक्षा होस् भन्ने कुरा हामीले सोच्नसम्म सक्दैनौँ ।
मैले साढे ४ वर्ष भयो बुद्ध एयरसँग काम गरेको । अहिलेसम्मको अनुभवका आधारमा म भन्छु, सुरक्षामा बुद्ध एयरले कहिल्यै कम्परमाइज गर्दैन ।
यात्रु महानुभावहरूलाई भन्छु कि कहिलेकाहीँ प्राविधिक समस्याहरू आउँछन्, जुन हामीले चाहेर नआउने होइन । यसबाट आत्तिनु पर्दैन ।
जहाजमा कहिलेकाहीँ टेक्निकल प्रब्लम आउनु नर्मल नै हो । यस्तो फल्टहरू सधैँ आउने होइन ।
जहाजमा दुईवटा इञ्जिन हुन्छ । तर हाम्रोमा जहाजले एउटा इञ्जिनले धान्न सक्ने लोड मात्रै बोक्छ ।
त्यसकारण एउटा इञ्जिनले पनि उडान अवतरण गर्न सक्छन् ।
(लोकान्तरसँगको कुराकानीमा आधारित)
