अरुणाचल प्रदेशबाट हराइरहेका एक भारतीय युवकलाई पत्ता लगाउन भारतीय सेनाले चिनियाँ जनमुक्ति सेनासँग माग गरेको छ । 

युवकलाई स्थापित प्रोटोकल अन्तर्गत फर्काउन भनिएको भारतका रक्षा स्रोतले भारतीय सञ्चारमाध्यमलाई बताएका छन् । 

उक्त युवक जडीबुटी संकलन र शिकारका लागि गएको बेलामा बाटो हराएको र नभेटिएको बताइएको छ ।

‘अरुणाचल प्रदेशका मिराम तारोन हराएको घटनाका विषयमा खबर पाउनेबित्तिकै भारतीय सेनाले तत्कालै चिनियाँ जनमुक्ति सेनासँग सम्पर्क गरेको थियो । उनी बाटो हराएर भेटिएनन् । उनलाई खोज्न चिनियाँहरूसँग सम्पर्क गरिएको छ,’ रक्षा स्रोतहरूले बताए । 

यसअघि कांग्रेस नेता राहुल गान्धीले भारतीय युवकलाई चिनियाँ जनमुक्ति सेनाले अपहरण गरेको विषयलाई केन्द्र सरकारले प्रतिक्रिया नदिएको र सरकारलाई जनताको वास्ता नगरेको बताए ।

पूर्वी अरुणाचल प्रदेशका सांसद तापिर गाओले पनि मंगलवार युवकलाई अपहरण गरिएको दाबी गरे । साङ्पो नदीमा भारतमा प्रवेश गरेको स्थानमा युवकलाई अपहरण गरिएको उनको दाबी छ ।