भारतको उत्तर प्रदेश राज्यमा विधानसभा चुनावको सरगर्मी बढेको छ । 

हालसम्म लोकसभा चुनाव लड्दै आएका मुख्यमन्त्री योगी आदित्यनाथ यसपालि विधानसभा चुनावको मैदानमा उत्रिने भएका छन् ।

योगी गोरखपुर सीटबाट चुनाव लड्ने भएका छन् । यसअघि योगी सोही क्षेत्रबाट लोकसभा चुनाव लड्दै आएका थिए ।

मुख्यमन्त्री योगीलाई टक्कर दिन भीम आर्मीका नेता चन्द्रशेखर आजाद ‘रावण’ गोरखपुर सीटबाट चुनाव लड्ने भएका छन् । योगीविरुद्ध रावण मैदानमा उत्रिने भएपछि चुनाव झनै रोचक हुने भारतीय सञ्चारमाध्यमले जनाएका छन् ।

रावणले एक अन्तर्वार्तामा भने, ‘उत्तर प्रदेशमा न रामराज्य छ, न योगी राम । योगी कामका आधारमा होइन, धर्मका आधारमा चुनाव लड्दैछन् ।’

केही दिनमै गोरखापुर गएर चुनावी अभियान शुरू गर्ने तयारी रावणले गरेका छन् । गोरखपुरमा रावणलाई समाजवादी पार्टी (सपा) ले समेत समर्थन गर्ने भएको छ ।