चन्द्रागिरि नगरपालिकाले माघ मसान्तभित्र आफ्नै नयाँ भवनमा सर्ने तयारी गरेको छ । यसका लागि चन्द्रागिरि–१२ स्थित गुर्जुधारामा करीब सात रोपनी जमिनमा  प्रशासकीय भवन तथा अन्य संरचना  निर्माणाधीन छन् । 

मौलिक एवं सास्कृतिक कलात्मक आँखीझ्याल संरचनाको  ६ तलाको सो  भवन २५ करोड रूपैयाँको लागतमा सम्पन्न हुन लागेको हो । 

तीन रोपनीमा प्रशासनिक भवन र चार रोपनीमा बाह्य संरचना बनिरहेको र  सो रकममध्ये जिल्ला समन्वय समिति काठमाडौंको १० करोड र बाँकी नगरपालिकाको आन्तरिक स्रोत रहेको जनाइएको छ ।   

'यही माघ मसान्तभित्रमा हामी नयाँ भवन सर्दैछौँ ।  भवन उद्घाटनको तयारी हुँदैछ,' नगरप्रमुख घनश्याम गिरीले भने । 

बाल, जेष्ठ नागरिक र अपाङगता मैत्री  भवनको भित्री संरचना कोठा, हल तयार गर्ने , छुट्याउने, रङ्गरोगन गर्ने तथा बाह्य संरचनामा बगैँचा बनाउने काम जारी छ । 

नयाँ भवनबाट पशु सेवा कार्यालय बाहेक अन्य सेवा  नगरवासीले एकीकृत रुपमा पाउने उनको भनाइ छ । 

समन्वय समितिका प्रमुख शिवसुन्दर राजवैद्य र नगर प्रमुख गिरीले २०७६ मंसिर ११ गते संयुक्त रुपमा सो भवनको शिलान्यास गरेका थिए ।