मिलेनियम च्यालेन्ज कम्प्याक्ट (एमसीसी)बारे प्रधानमन्त्री एकलौटी रुपमा अघि बढे नेकपा (माओवादी केन्द्र) गठबन्धन र सरकारबाट बाहिरिने बताएको छ । 

नेकपा माओवादी केन्द्रका नेता एवं संसदीय दलका प्रमुख सचेतक देव गुरुङले एकलौटी रूपमा एमसीसी अघि बढे गठबन्धन र सरकार छाड्ने बताए ।

‘पाँच दलको सहमतिविना सरकारको निर्णय हुन सक्दैन । गठबन्धनको निर्णयविना कुनै घटक आफ्नो हिसाबले अगाडि बढ्यो भने गठबन्धन तोडिने कुरा हुन्छ, गठबन्धन तोडियो भने सरकार पनि स्वतः तोडिन्छ,’ बैठकपछि गुरुङले भने ।

उनले एमसीसी संसदमा लैजान सरकारले निर्णय गर्नुपर्ने बताएका छन् ।

लोकान्तर डटकमसँगको छुट्टै कुराकानीमा गुरुङले भने, ‘पाँच दलीय गठबन्धनको सरकार छ । सरकारले निर्णय नगरेसम्म संसदमा लैजान मिल्दैन । अहिलेसम्म गठबन्धनमा सहमति बनेको छैन । सरकारले पनि निर्णय गरेको छैन ।’

केपी ओली नेतृत्वको सरकारले निर्णय गरेर संसदमा पेश गर्ने निर्णय गरेको भए पनि त्यसले अहिले काम नगर्ने उनले दाबी गरे ।

‘अघिल्लो सरकारले अघि बढाएको विधेयक संसदमा लैजान पनि सरकारको निर्णय चाहिन्छ । एमसीसीबारे पनि सरकारले निर्णय गर्नुपर्छ । प्रधानमन्त्री एकलौटी ढंगले चल्न मिल्दैन,’ गुरूङले भने ।