जनता समाजवादी पार्टी (जसपा)का संघीय परिषद् अध्यक्ष डा. बाबुराम भट्टराईले सबै तहका पदाधिकारीले पार्टीमा पूर्णकालीन सरह समय दिनुपर्ने प्रस्ताव गरेका छन् । 

काठमाडौंमा शनिवार शुरू भएको संघीय परिषद्को बैठकमा राजनीतिक प्रतिवेदन पेश गर्दै उनले पार्टीमा व्यक्ति होइन पद पूर्णकालीन हुनुपर्ने प्रस्ताव गरेका हुन् । 

‘हाम्रो पार्टीमा व्यक्तिगत तबरमा पूर्णकालीन कार्यकर्ता हुँदैनन् । पूर्णकालीन कार्यकर्ताको ठूलो पंक्ति तयार गर्ने र पार्टीले कार्यकर्ताको निजी जीवन व्यवस्थापन गर्ने प्रकारको पार्टी अबको युगमा बनाउन सकिन्न,’ प्रतिवेदनमा भनिएको छ, ‘तर, जिम्मेवारीको आधारमा व्यक्तिले पूर्णकालीन सरह परिचालित हुनु पर्दछ । अर्थात् जनता समाजवादी पार्टीमा व्यक्ति हैन, पद पूर्णकालीन हुनेछ, त्यो पनि मूलतः स्वयंसेवी चरित्रको पूर्णकालीन । सामान्यतयाः सबै तहका पदाधिकारीहरुले पूर्णकालीन सरह समय दिनु पर्दछ ।’

उनले पार्टी केन्द्रीय समिति, जनसंगठनका केन्द्रीय पदाधिकारी, प्रादेशिक तथा स्थानीय पार्टीका पदाधिकारीहरूले पूर्णकालीन सरह समय दिनुपर्ने बताए । अन्यथा पार्टीले विकास गर्न नसक्ने बताएका हुन् । 

‘पार्टीको महत्वपूर्ण पदमा रहने तर निजी तथा व्यक्तिगत काममा नै व्यस्त रहने हो भने पार्टी कामले गति लिँदैन । हरदम पार्टीको, पार्टी कामको चिन्ता गर्ने एउटा पंक्ति विना पार्टीले निर्णायक रुपमा विकास गरेको उदाहरण संसारमा कहीँ पनि पाइँदैन । पार्टी कामका सन्दर्भमा हुने आधारभूत खर्चपर्च आर्थिक नियमावली बनाएर व्यवस्थापन गर्नु पर्दछ,’ प्रतिवेदनमा भनिएको छ । 

यस्तो छ राजनीतिक प्रतिवेदन