३१ असार २०८३, बुधबार
नेकपा एमालेका केन्द्रीय सदस्य घनश्याम भुसालले वामपन्थी पार्टीहरू बीचमा एकता गर्ने प्रस्ताव पोलिटव्यूरो बैठकमा पेश गरेका छन् ।
काठमाडौंको बबरमहलस्थित कार्की व्यांक्वेटमा चलिरहेको एमालेको पोलिटब्यूरो बैठकमा भुसालले तीन बुँदे पस्ताव पेश गर्दै वामपन्थी एकताको नेतृत्व एमालेले लिनुपर्ने बताएका हुन् ।
एमाले वाम एकताको मूल प्रवाह भएको, विभाजित पार्टीहरू बीच वैचारिक र सैद्धान्तिक भिन्नता नभएको र आगामी निर्वाचनमा वामपन्थी जीत निश्चित गर्न पार्टी एकता गर्नुपर्ने भुसालले बैठकमा बताएका थिए ।
भुसालको प्रस्तावमा अर्का नेता रघुजी पन्तले समर्थन गरेको बैठकमा सहभागी एक नेताले जानकारी दिए ।
एमाले अध्यक्ष केपी ओलीलाई भुसालले वामपन्थी पार्टीबीचको एकताको नेतृत्व लिन आग्रह गरेका हुन् ।
भुसालको प्रस्तावमा एमाले नेता महेश बस्नेतले भने विरोध गरेका थिए । बस्नेतले नेता मिलाएर मात्रै पार्टी बलियो नहुने भएकाले तत्काल माधव नेपाल र प्रचण्डसँग पार्टी एकता गर्न नसकिने बरु ती पार्टीका कार्यकर्तालाई एमालेमा तान्नुपर्ने मत बैठकमा राखेका थिए ।
नेता मिलाउनेभन्दा कार्यकर्ता आकर्षित गरेर दुई दलीय प्रणालीमा जानेतर्फ अग्रसर हुनुपर्ने बस्नेतको तर्क रहेको छ ।
भुसाल र पन्त एमालेमा दशबुँदे सहमती मानेर बसेका नेताहरु हुन् । उनीहरूले विभाजित पार्टीलाई एकीकृत बनाउनुपर्ने र तत्काल पार्टी एकता सम्भव नभए वामपन्थी पार्टीहरू बीच चुनावी गठबन्धन बनाउनुपर्ने मत बैठकमा राखेका छन् ।
