एमाले अध्यक्ष केपी शर्मा ओलीले सरकार चुनाव सार्ने षड्यन्त्रमा लागेको टिप्पणी गरेका छन् । 

मोतिदेवी स्मृति केन्द्रले मंगलवार काठमाडौंमा आयोजना गरेको ‘संघर्षशील योद्धाहरू’ पुस्तक विमोचन कार्यक्रमलाई सम्बोधन गर्दै ओलीले लोकतन्त्र जोगाउन खोज्ने भन्दा चुनाव नगर्न षड्यन्त्र गर्ने खालको सरकार रहेको बताएका हुन् । 

कार्यक्रमलाई सम्बोधन गर्दै ओलीले भने, ‘जनताबाट नआएको, परमादेशबाट आएको, जनताप्रति गैरजिम्मेवार भएको, चुनाव गरेर लोकतन्त्र जोगाउन खोज्ने भन्दा चुनाव नगर्न षड्यन्त्र गर्ने खालको सरकार छ ।’

वर्तमान सरकारले जालझेल, षड्यन्त्र, तिकडम गरिरहेको आरोप पनि ओलीले लगाएका छन् । उनले भने, ‘समय त हिजोको जस्तो छैन । सरकार चाहिँ झण्डै उसैबेलाको जस्तो छ । जालझेल, षड्यन्त्र, तिकडम गर्ने खालको छ ।’ 

जनताबाट निर्वाचित नभएर नआएको र अदालतको परमादेशबाट आएको कारण अहिलेको सरकार जनताप्रति उत्तरदायी नभएको उनले बताए ।