नेकपा (माओवादी केन्द्र) अध्यक्ष पुष्पकमल दाहाल ‘प्रचण्ड’ले सदन खुल्ने बित्तिकै नागरिकता विधेयक अगाडि बढाउने बताएका छन् । 

शनिवार जनकपुरको तिरुतियामा भएको चुनावी सभालाई सम्बोधन गर्दै उनले मधेशमा अझै पहिचान र अधिकारका कुरा अपूरो भएको भन्दै नागरिकता विधेयक जसरी पनि अगाडि बढाउने बताएका हुन् । 

‘मधेशमा नागरिकताको समस्या चर्को रुपमा रहेको छ, समस्या समाधान गर्न गठबन्धनमा धेरै छलफल गरेका छौं,’ उनले भने, ‘अब संसद खुल्नेबित्तिकै नागरिकता विधेयकलाई अगाडि बढाउँछौँ । एमालेले सदन अवरोध गरे पनि जुनसुकै हालतमा नागरिकताको विषय सदनमा प्रवेश गराउनै पर्छ ।’

यस्तै उनले आफू दोस्रोपटक प्रधानमन्त्री हुँदा संविधान संशोधन गर्न चाहे पनि एमालेका कारण संसदमा दर्ता भएको प्रस्ताव पारित हुन नसकेको दोहोर्‍याए ।