नेकपा एमालेका अध्यक्ष केपी शर्मा ओलीले स्थानीय तह निर्वाचनमा सत्तारुढ गठबन्धनले हिंसा भड्काएको आरोप लगाएका छन् । 

स्थानीय तह निर्वाचनको मतदान सकिएपछि विज्ञप्ति प्रकाशन गर्दै ओलीले गठबन्धनले सत्ताको बलमा उत्तेजनापूर्ण गतिविधि गरी अनावश्यक रूपमा वातावरण बिथोल्ने र अनुचित ढंगले हिंसा भड्काउने जस्ता कार्य गरेको आरोप लगाएका हुन् ।

केही स्थानमा एमालेविरूद्ध अग्रिम नक्कली मतपत्रसमेत छापी वितरण गरेको पाइएको ओलीले बताएका छन् । 

कतिपय स्थानीय तहमा गृह प्रशासनको अस्वभाविकरुपमा असन्तुलन देखिएको पनि ओलीले बताएका छन् । 

लोकतन्त्र र अग्रगमनको नाम जपेर अलोकतान्त्रिक र प्रतिगामी अभ्यासमा लिप्त रहने गठबन्धनबाट अधिनायकवादी कार्य भएको ओलीको विज्ञप्तिमा उल्लेख छ । 

भयरहित र धाँधलीरहित वातावरणमा स्वच्छ, निष्पक्ष निर्वाचनका लागि आफ्नो सिंगो पार्टीले अधिकतम सकारात्मक भूमिका निर्वाह गरेको उनले बताएका छन् । 

‘स्वतन्त्र निर्वाचनविरूद्ध भएका यस्ता घटनाको विरोध गर्दै सरकारको पूर्वाग्रही र पक्षपाती व्यवहारप्रति दुःख व्यक्त गर्दछु,’ ओलीले भनेका छन् । 

धाँधली भएको र हिंसा भड्किएको मतदान केन्द्रमा पुनः मतदान गराउन ओलीले माग गरेका छन् । 

‘स्वच्छ निर्वाचन विपरितका घटना भएका, मतदान केन्द्रको अनधिकृत कब्जा गरिएका र भय त्रास सिर्जना गरी मतदाताहरूलाई आतंकित पारिएका स्थानमा पुनः मतदानको माग गरी विभिन्न जिल्लाबाट उजुरीसमेत गरिएको छ। यसलाई गम्भीरतापूर्वक लिन म निर्वाचन आयोगको ध्यानाकर्षण गराउँछु,’ ओलीले जारी गरेको विज्ञप्तिमा भनिएको छ ।