३१ असार २०८३, बुधबार
युक्रेन सेनाको शीर्ष कमान्डले मरिउपोलस्थित आजोभस्टालमा घेराबन्दीमा परेका सैनिकहरूलाई आत्मसमर्पणको आदेश दिएको सामाजिक सञ्जालमा पुष्टि गरेको छ यद्यपि आत्मसमर्पण भन्ने शब्द प्रयोग गरिएको छैन ।
युक्रेनी सेनाको विज्ञप्तिमा उल्लेख गरिएको छ, ‘मरिउपोल ग्यारिसनले आफ्नो कम्ब्याट मिसन पूरा गरेको छ । शीर्ष सैन्य कमान्डले आजोभस्टालमा रहेका सैन्य इकाइका कमान्डरहरूलाई सैनिकको ज्यान जोगाउनका लागि आदेश दिएको छ ।’
आजोभस्टालमा डटिरहेर आफ्ना सैनिकहरूले रुसी सैनिकहरूलाई अन्य क्षेत्रमा कारवाही चलाउनबाट रोकेको युक्रेन सरकारको दाबी छ ।
आजोभ बटालियन तथा नियमित युक्रेनी सैनिकहरूले जापोरोझ्येलाई तत्काल कब्जा गर्नबाट रुसी सैनिकहरूलाई रोक्न सकेको युक्रेनको भनाइ छ । त्यस्तै उनीहरूले रुसी सैनिकलाई डोनेत्स्क र जापोरोझ्ये क्षेत्रको प्रशासनिक सीमामा पनि पहुँच दिएका छैनन् ।
युक्रेनका राष्ट्रपति भोलोदीमीर जेलेन्स्कीले आजोभस्टालका नायकहरूको ज्यान जोगाउनु प्राथमिकतामा रहेको बताए । आफ्ना सैनिकहरू फिर्ता ल्याउनका लागि प्रयास जारी रहेको जानकारी पनि उनले दिए ।
आजोभस्टालमा रहेका अधिकांश सैनिकहरू नवनाजी आजोभ रेजिमेन्टका सदस्य हुन् । उनीहरूको सैन्य पोशाकमा नाजी चिह्नहरू देखिन्छन् ।
आत्मसमर्पणको पहिलो चरण सोमवार पूरा भएको छ । कुल २६४ सैनिकहरू आजोभस्टाल छोडेर गइसकेका छन् । ५३ जना घाइते सैनिक नोभोआजोव्स्कस्थित अस्पतालमा राखिएका छन् भने २११ सैनिक येलेनोव्कामा छन् ।
विशाल आजोभस्टालको भूमिगत बंकरहरूमा लगभग २२ सयजना अझै रहिरहेको रुसी स्रोतहरूले अनुमान गरेका छन् । उक्त स्थान ११ वर्ग किलोमिटर लामो छ र त्यसका भूमिगत क्षेत्रहरू आणविक आक्रमण समेत झेल्न सक्ने गरी बनाइएका छन् ।
