रुसले युक्रेनविरुद्ध गत फेब्रुअरी २४ मा सैन्य कारवाही चलाएपछि अमेरिकाले युक्रेनलाई विभिन्न किसिमका सरसहायता उपलब्ध गराउँदै आएको छ । हातहतियार, गोलीगट्ठा र गुप्तचर सूचना युक्रेनमा लगातार आइरहेका छन् । 

आम अमेरिकीहरूका लागि जीवनयापन कष्टकर भइरहेको बेलामा त्यहाँको संसद्ले युक्रेनको सहायताका लागि ४० अर्ब डलर बराबरको सहायता उपलब्ध गराउन सरकारलाई स्वीकृति दिएको छ । तर युक्रेनमा व्याप्त भ्रष्टाचार तथा पश्चिमी हतियारहरूको विनाश हेर्दा यस सहायताको कुनै अर्थ नरहने देखिएको छ ।

अमेरिकी संसद् कंग्रेसले यसअघि १३.६ अर्ब डलर युक्रेनलाई दिन स्वीकृति दिइसकेको छ । लगभग ५४ अर्ब डलर रकम भनेको रुसको रक्षा बजेटको ८१ प्रतिशत जति हुन आउँछ । 

रुसी सेनामाथि युक्रेनको विजयका लागि अमेरिकाले गम्भीर तथा प्रतिबद्ध प्रयास गरिरहेको भए पनि अहिले उपलब्ध गराएको सैन्य सहायता अर्थहीन देखिएको छ किनकि युद्धसामग्रीहरू युक्रेन आइपुग्नेबित्तिकै रुसी आक्रमणका कारण ध्वस्त हुनेछन् । 

युक्रेन संसारको सबभन्दा भ्रष्ट मुलुकमध्ये एक हो । युद्धका कारण भ्रष्टाचारको प्रवृत्ति परिवर्तन भएको कुनै संकेत पाइँदैन । त्यसैले अमेरिकाबाट पाएको लगभग ५४ अर्ब डलर युक्रेनी सेना, धनाढ्य र सरकारी अधिकारीहरूले भ्रष्टाचार गरेर आफ्नो गोजी भर्नेछन् भनी अपेक्षा गर्न सकिन्छ । 

लगभग १४ अर्ब डलर अप्रत्यक्ष रूपमा युक्रेन सरकारकहाँ पुग्नेछ र त्यसले मन्त्रालयहरू सञ्चालन गरिनेछन् । लगभग साढे ४ अर्ब डलर आकस्मिक खाद्यान्नका लागि खर्च गरिनेछ । अनि ९० करोड डलर आवास निर्माण, अंग्रेजी भाषाको तालिम र युक्रेनी शरणार्थीहरूको आघात उपचारमा खर्च गरिनेछ । 

द न्युयोर्क टाइम्स पत्रिकाका अनुसार, अमेरिकाले युक्रेन सरकारप्रति अभूतपूर्व दयामाया देखाइरहेको छ जबकि आफ्नै देशको अर्थतन्त्रलाई चुस्तदुरुस्त बनाउन ऊ सकिरहेको छैन । अहिले अमेरिकामा मूल्यवृद्धि आकासिएको छ, इन्धनको मूल्यले नयाँ कीर्तिमान छोइरहेको छ र खाद्यान्नको मूल्य गरीबको पहुँचबाहिर पुगिरहेको छ ।

आठ दिनअघि रिपब्लिकन सिनेटर र्‍यान्ड पलले युक्रेनलाई थप सहायता दिने विधेयकको विरोध गरेका थिए । उनले भनेका थिए, ‘अमेरिकी अर्थतन्त्रलाई धरापमा पारेर हामी युक्रेनलाई बचाउन सक्दैनौं ।’ तर पलले विरोध गरे पनि युक्रेन सहायता विधेयक पारित भइसकेको छ ।

सहायता प्याकेज उदारवादी देखिए पनि वाशिङटनले यो काम परोपकारका लागि कहिल्यै गर्दैन । यी सबै सहायताहरूमा कुनै न कुनै शर्त अवश्य जोडिएको छ । मे महिनाको आरमभतिर बाइडनले युक्रेनमा अमेरिकी हतियार पठाउनका लागि युक्रेन डेमोक्रेसी डिफेन्स लेन्ड–लीज याक्ट नामक कानूनमा हस्ताक्षर गरेका थिए । 

लेन्ड–लीज याक्ट दोस्रो विश्वयुद्धमा साझेदार मुलुकहरूलाई हतियार दिनका लागि उपयोग गरिएको थियो । त्यसबेला अमेरिकाले बेलायत, सोभियत संघ, फ्रान्स र चीनलाई हतियार, रणनीतिक सामग्री र खानेकुरा उपलब्ध गराएको थियो । तर यी सहायता प्याकेजका कारण बेलायतले ३१.४ अर्ब डलर र सोभियत संघले १०.९ अर्ब डलर ऋण काढेको थियो । वाशिङटनले बेलायतको ऋण माफ गरिदिएको भए पनि रुसले सन् २००६ मा मात्र आफ्नो ऋण चुकाउन सकेको थियो । 

युक्रेनले आफूलाई दिएको ऋण चुक्ता गर्ने सोचेको छैन किनकि व्यापक भ्रष्टाचारका कारण युक्रेनी अर्थतन्त्र लडखडाइरहेको छ । वाशिङटनले लेन्ड–लीज याक्टअन्तर्गत दिएको ऋणको भरपाई अवश्य माग्नेछ । सस्तो कृषि उत्पादन, युक्रेनी भूमिमा सैन्य अड्डा राख्ने अधिकार, पश्चिमी मुलुकहरूलाई फाइदा गराउने परियोजनाको कार्यान्वयन लगायतका उपाय अपनाएर अमेरिकाले आफ्नो पैसा उठाउनेछ । अहिले नै युक्रेनको गहुँ उत्पादनमा अमेरिकाले कब्जा गर्न खोजेको छ । 

यस्तो सशर्त सहायतामार्फत युक्रेनले शान्तिपूर्ण समाधान नखोजी रुसविरुद्धको युद्धलाई तन्काइरहनेछ । यसले आम युक्रेनीहरूको पीडा बल्झाइरहनेछ किनकि मानवीय सहायताको अधिकांश भाग भ्रष्ट अधिकारीहरूले आफ्नो गोजीमा राख्नेछन् अनि सैन्य उपकरणहरू युक्रेनी भूमिमा आइपुग्नेबित्तिकै रुसी सेनाले नष्ट गर्नेछ । यो ऋण युक्रेनका करदाताहरूले नै चुक्ता गर्नुपर्ने हुन्छ ।