परराष्ट्र मन्त्री डा नारायण खड्काले राहदानी सङ्ग्रहालयको उद्‍घाटन गरेका छन् । राहदानी विभागले गत वर्ष असार ८ मा राहदानी सङ्ग्रहालय स्थापना गर्ने निर्णय गरेअनुसार मंगलबार संग्राहलयको उद्घाटन गरिएको हो । 

हाल राहदानी सङ्ग्रहालयमा विक्रम संवत् १९५७ सम्मका गरी विभिन्न प्रकारका राहदानी संकलन गरिएको विभागले जनाएको  छ। साथै विद्युतीय माध्यमबाट कियोस्क मेसिनको प्रयोग गरी हेर्न सकिने व्यवस्था समेत गरिएको छ। यस प्रकारको प्रविधि प्रयोग गरेर बनाइएको यो नेपालको पहिलो सङ्ग्रहालय भएको विभागले जारी गरेको विज्ञप्तिमा उल्लेख छ । 

विभागका अनुसार नमुना राहदानी एक पाने नेपाली कागजमा लेखिएका समेत गरी हाल करिब ३०० राहदानी तथा विभिन्न कागजात सङ्ग्रह गरिएको छ। राहदानी सङ्ग्रहालयको प्राविधिक पक्षहरूमा र पुरानो राहदानी संकलन गर्न पुरातत्व विभाग, राष्ट्रिय सङ्ग्रहालय छाउनी तथा राष्ट्रिय अभिलेखालयले सहयोग गरेका थिए।  विभागले वेबसाइट मार्फत पनि अवलोकन गर्न सकिने व्यवस्था छिट्टै गर्ने जनाएको छ।