स्थानीय तहको निर्वाचन सम्पन्न भएको झन्डै १ महिना हुन लाग्दा पनि बदर मतको हिसाब निकाल्न नसक्दा निर्वाचन आयोगलाई टाउको दुखाइको विषय बनेको छ ।

निर्वाचन आयोगका सहप्रवक्ता सूर्य प्रसाद अर्याल खसेको मत, प्राप्त मत र बदर मत जोड्दा हिसाब मिलान हुन नसकेकोले समस्या भइरहेको बताउँछन्।  

'बदर संख्या र गणना भएको संख्या जोड्दा टोटल मत पुग्न सकेको छैन,' अर्यालले लोकान्तरसँग भने,'कतिपय स्थानीय पालिकाबाट नै बदर मतको हिसाब र प्राप्त मतको हिसाब गरेर मिलान गर्दा पुग्नुपर्ने संख्या नपुग्दा समस्या भएको छ।'

पछिल्लो २ सातादेखि आयोगले बदर मतका लागि आयोगको सूचना प्रविधिका साथीहरू लागिपरेको उनले बताए ।

'धेरै दिन देखि हाम्रा साथीहरू हिसाब मिलान गर्न तथा भेरिफाइ गर्न लाग्नु भएको छ, अन्तिम हिसाब आउन अझै केही दिन लाग्न सक्छ,' अर्यालले लोकान्तरसँग भने।

तालमेल भएको महानगर र उपमहानगरमा मेयरमा १० प्रतिशत जति र उपमेयरमा १० प्रतिशतभन्दा बढी नै मत बदर भएको देखिएको उनले बताए।

काठमाडौं महानगरपालिका, भरतपुर महानगरपालिका, विराटनगर महानगरपालिका, पोखरा महानगरपालिका, ललितपुर महानगरपालिका, धनगढी उपमहानगरपालिकामा मेयर भन्दा पनि उपमेयरको मत बढी बदर भएको उनले बताए।

त्यसै गरी विभिन्न पालिकामा वडाध्यक्षको मत भन्दा पनि वडासदस्यको मत बढी बदर भएको उनले बताए।