नेकपा एमालेका सांसद योगेशकुमार भट्टराईले स्वास्थ्य क्षेत्रमा सरकारले चासो नदिएको आरोप लगाएका छन् । मंगलवार प्रतिनिधि सभाको बैठकमा बोल्दै उनले स्वास्थ्य क्षेत्रमा सरकारले चासो नदिएको आरोप लगाएका हुन् । 

अमेरिका, बेलायतलगायत विकसित देशहरूमा पनि मंकीपक्स फैलिरहेको अवस्थामा सरकारले आवश्यक सतर्कता नअपनाएको उनको गुनासो छ । सरकारले देशका सीमा–नाकाहरूमा स्वास्थ्य परीक्षण केन्द्र राख्नुपर्ने भट्टराईको सुझाव छ । 

उनले मंकीपक्सका कारण विश्व स्वास्थ्य संगठनले स्वास्थ्य संकटकाल घोषणा गरिसक्दा पनि सरकार भने ‘कानमा तेल हालेर बसेको’ आरोप लगाए । मंकीपक्सका बारेमा नागरिकलाई सुसूचित गर्न सरकारले चासो नदिएको उनको गुनासो छ । उनले जनस्वास्थ्यको कुरामा सरकार निन्द्राको अवस्थामा रहनु दुःखद भएको बताए । 

सांसद भट्टराईले सरकारले हालसम्म सिमानाहरूमा एउटा पनि साइनबोर्ड र परीक्षण केन्द्र नराखेको बताए । उनले छिमेकी देश भारतमा ४ जनामा मंकीपक्स पुष्टि भइसकेको भन्दै नेपाल पनि यो विपद्बाट टाढा नरहेको बताए । ‘भारतमा यसका ४ वटा केसहरु देखिसकेका छन् । हामी पनि यसबाट धेरै टाढा छैनौँ’, उनले भने, ‘विपत्ति नआओस् भन्नका लागि पूर्वसतर्कता र तयारी अपनाउनका निम्ति ध्यानाकर्षण गर्दछु । सिमानामा कडाइ गर्नुपर्छ । सचेतना फैलाउनुपर्छ । परीक्षण केन्द्र राख्नुपर्छ ।’

सांसद भट्टराईले काठमाडौंमा हैजा समुदायस्तरमै फैलिसकेको बताएका छन् । हालसम्म ३४ जनामा हैजाको संक्रमण फेला परेको भन्दै महामारीको स्थिति उत्पन्न हुन सक्नेतर्फ सरकारलाई सचेत गराए । उनले हैजा नियन्त्रणका लागि पिउने पानीका मुहान र सप्लाई गर्ने ट्याङ्करको गुणस्तर परीक्षण गर्न पनि सरकारको ध्यानाकर्षण गराए ।